പത്തനംതിട്ട : ട്രാന്സ്ഗ്രിഡ് 2.0 ശബരി പാക്കേജ് പദ്ധതിയുടെ ഭാഗമായി നടപ്പാക്കിയ പത്തനംതിട്ട 220 കെവി ഗ്യാസ് ഇന്സുലേറ്റഡ് സ്വിച്ച് ഗിയര് (ജിഐഎസ്) സബ്സ്റ്റേഷന് ഉദ്ഘാടനം സെപ്റ്റംബര് 19 വൈകിട്ട് നാലിന് പത്തനംതിട്ട മേരിമാത ഫോറോന ചര്ച്ച് ഓഡിറ്റോറിയത്തില് വൈദ്യുതി വകുപ്പ് മന്ത്രി കെ കൃഷ്ണന്കുട്ടി നിര്വഹിക്കും. ആരോഗ്യവകുപ്പ് മന്ത്രി വീണാ ജോര്ജ് അധ്യക്ഷത വഹിക്കും. ആന്റോ ആന്റണി എം പി മുഖ്യാതിഥിയാകും. ജില്ലാ പഞ്ചായത്ത് പ്രസിഡന്റ് ജോര്ജ് എബ്രഹാം, ജില്ലാ കളക്ടര് എസ് പ്രേം കൃഷ്ണന്, പത്തനംതിട്ട നഗരസഭാ ചെയര്പേഴ്സണ് അഡ്വ. ടി. സക്കീര് ഹുസൈന്, കെഎസ്ഇബി ലിമിറ്റഡ് ചെയര്മാന് ആന്ഡ് മാനേജിങ് ഡയറക്ടര് മിന്ഹാജ് ആലം, സ്വതന്ത്ര ഡയറക്ടര് അഡ്വ.വി. മുരുകദാസ്, ട്രാന്സ്ഗ്രിഡ് ചീഫ് എഞ്ചിനീയര് കെ.എസ് ഷീബ, നഗരസഭ കൗണ്സിലര്മാര്, രാഷ്ട്രീയ പ്രതിനിധികള്, വകുപ്പ് ഉദ്യോഗസ്ഥര് തുടങ്ങിയവര് പങ്കെടുക്കും. കെഎസ്ഇബി ലിമിറ്റഡ് ട്രാന്സ്മിഷന് ആന്ഡ് സിസ്റ്റം ഓപ്പറേഷന് ഡയറക്ടര് എസ് ശിവദാസ് റിപ്പോര്ട്ട് അവതരിപ്പിക്കും.
വൈദ്യുതി പ്രസരണമേഖലയുടെ കരുത്ത് വര്ധിപ്പിക്കുന്ന പദ്ധതിയായ ട്രാന്സ്ഗ്രിഡ് 2.0 ഭാഗമായി പത്തനംതിട്ടയില് 220 കെവി ഗ്യാസ് ഇന്സുലേറ്റഡ് സബ്സ്റ്റേഷനും അനുബന്ധമായി 55 കി.മി 220/110 കെവി ലൈനുകളുമാണ് യാഥാര്ഥ്യമാകുന്നത്. ഇതോടെ പ്രസരണനഷ്ടം ഗണ്യമായി കുറയ്ക്കാനും ശബരിഗിരി, ഇടമണ്, ഇടപ്പോണ് എന്നിവിടങ്ങളിലെ 220 കെവി സ്രോതസുകള് സംയോജിപ്പിക്കാനും ജില്ലയില് സുസ്ഥിരമായ വൈദ്യുതി ലഭ്യത ഉറപ്പിക്കാനുമാകും.
