കോന്നി: അരുവാപ്പുലം ഗ്രാമപഞ്ചായത്ത് 13 -ാം വാർഡിൽ യുഡിഎഫ് സ്ഥാനാർഥിയുടെ നാമനിർദേശ പത്രിക അസാധുവാക്കി. ഡെമ്മിയായി പത്രിക നൽകിയിരുന്ന ഭാര്യ യുഡിഎഫ് സ്ഥാനാർഥിയാകും. കോണ്ഗ്രസ് സ്ഥാനാർഥിയായി പത്രിക നൽകിയിരുന്ന സന്തോഷ് കുമാറിന്റെ പത്രികയാണ് സിപിഎം പരാതിയേ തുടർന്ന് തള്ളിയത്.
ഇതേ വാർഡിൽ ഡെമ്മി സ്ഥാനാർഥിയായിരുന്ന സന്തോഷിന്റെ ഭാര്യ സ്മിത എസ്. നായരുടെ പത്രിക അംഗീകരിച്ചതോടെ അവരെ മത്സരിപ്പിക്കാൻ കോണ്ഗ്രസ് തീരുമാനം. കഴിഞ്ഞതവണ ഇതേവാർഡിലെ മെമ്പറായിരുന്നു സ്മിത.
കരാർ ജോലികൾ ചെയ്യുന്ന സന്തോഷ് കുമാർ അരുവാപ്പുലം പഞ്ചായത്തിൽ നാല് ജോലികൾ ഏറ്റെടുത്തിരുന്നു. കരാർ എടുക്കുന്നയാൾ മത്സരിക്കാൻ പാടില്ലെന്ന തെരഞ്ഞെടുപ്പ് ചട്ടം നിലനിൽക്കേ ഇത് മറച്ചുവെച്ചുകൊണ്ട് ഇദ്ദേഹം പത്രിക സമർപ്പിച്ചതെന്നായിരുന്നു സിപിഎം നേതാക്കളുടെ പരാതി.