പത്തനംതിട്ട: കോണ്ഗ്രസ് കമ്മിറ്റികളുടെയും ഭാരവാഹികളുടെയും പ്രവര്ത്തന മികവ് വിലയിരുത്തുന്നതിനുള്ള ജില്ലാതല മികവ് പരിശോധനയില് ഭാരവാഹികളില് ഏറെപ്പേരും ഉള്പ്പെട്ടത് മഞ്ഞ കാറ്റഗറിയില്. ശരാശരി പ്രവര്ത്തനം നടത്തുന്നവരെയാണ് മഞ്ഞ കാറ്റഗറിയിലുള്പ്പെടുത്തിയത്. മികച്ച പ്രവര്ത്തകര്ക്കുള്ള പച്ച കാറ്റഗറിയില് ഡിസിസി പ്രസിഡന്റ് അടക്കം 11 ജില്ലാ ഭാരവാഹികള് ഉള്പ്പെട്ടു.
ഡിസിസി ഭാരവാഹികളുടേയും ബ്ലോക്ക് പ്രസിഡന്റുമാരുടേയും ഒരു ദിവസം മുഴുവന് നീണ്ടു നിന്ന റിവ്യുവിന് പെര്ഫോര്മന്സ് അസസ്മെന്റിന്റെ സംസ്ഥാന ചുമതലയുള്ള കെപിസിസി ജനറല് സെക്രട്ടറി സജീവ് ജോസഫ്, ജില്ലാ ചുമതലയുള്ള കെപിസിസി ജനറല് സെക്രട്ടറി എ.എ.ഷുക്കൂര്, ഡിസിസി പ്രസിഡന്റ് ബാബു ജോര്ജ് എന്നിവര് നേതൃത്വം നല്കി. പരിശോധനയില് ജില്ലയിലെ ബ്ലോക്ക് പ്രസിഡന്റുമാരില് മൂന്നുപേര് പച്ച കാറ്റഗറിയിലും ആറുപേര് മഞ്ഞ കാറ്റഗറിയിലും ഒരാള് ചുവപ്പ് കാറ്റഗറിയിലുമായി. ഡിസിസി ഭാരവാഹികളില് 11 പേര് പച്ച കാറ്റഗറിയിലും 35 പേര് മഞ്ഞ കാറ്റഗറിയിലുമായി. 11 പേര് ചുവപ്പ് കാറ്റഗറിയിലാണ്. കെപിസിസി നടപ്പിലാക്കുന്ന വിലയിരുത്തലില് മികച്ച പ്രവര്ത്തനം നടത്തുന്നവര് പച്ചയിലും ശരാശരിക്കാര് മഞ്ഞയിലും ശരാശരിയില് താഴെയുള്ളവര് ചുവപ്പിലുമാണ് ഉള്പ്പെടുക.
ജൂലൈ, ഓഗസ്റ്റ്, സെപ്റ്റംബര് എന്നീ മൂന്ന് മാസത്തെ പ്രവര്ത്തന റിപ്പോര്ട്ടിന്റെ അടിസ്ഥാനത്തിലാണ് ആദ്യ വിലയിരുത്തല് നടന്നത്. ഇനി മുതല് ജില്ലയില് എല്ലാ മാസവും റിവ്യൂ നടത്തും. ആദ്യ റിവ്യൂവില് പിന്നില് പോയവരോട് തിരുത്തല് നടപടികള് നിര്ദേശിച്ചിട്ടുണ്ട്.