കണമല: പത്തനംതിട്ട കണമല-തുലാപ്പള്ളി ആലപ്പാട്ട് കവലയിലുണ്ടായ വാഹനാപകടത്തെ തുടർന്ന് ഫയർഫോഴ്സ് ഉദ്യോഗസ്ഥൻ മരിച്ച സംഭവത്തിൽ കൂടുതൽ വിവരങ്ങൾ പുറത്ത്. വനംവകുപ്പിന്റെ ആവശ്യപ്രകാരം മരം മുറിക്കുന്നതിനായി പോയി മടങ്ങിവരുന്നതിനിടെ ആലപ്പാട്ട് കവലയിൽ വെച്ച് വാഹനത്തിന്റെ ബ്രേക്ക് തകരാറിലായതാണ് അപകടത്തിന് കാരണമായതെന്നാണ് പ്രാഥമിക നിഗമനം. നിയന്ത്രണം വിട്ട ഫയർഫോഴ്സ് വാഹനം റോഡിലുണ്ടായിരുന്ന മറ്റ് ആറ് വാഹനങ്ങളിലേക്ക് ഇടിച്ചുകയറുകയായിരുന്നു.
അപകടത്തിൽ അഗ്നിശമന സേനയുടെ തിരുവല്ല യൂണിറ്റിലെ ഉദ്യോഗസ്ഥനായ രഞ്ജിത്ത് (35) ആണ് മരണപ്പെട്ടത്. അപകടത്തിൽ ഒമ്പത് പേർക്ക് പരിക്കേറ്റിട്ടുണ്ട്. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചു.വലിയ കൊടുംവളവുകളും തുടർച്ചയായ ഇറക്കവുമുള്ള കണമല പാതയിൽ മുൻപും നിരവധി വലിയ വാഹനാപകടങ്ങൾ റിപ്പോർട്ട് ചെയ്യപ്പെട്ടിട്ടുണ്ട്.അപകടവിവരമറിഞ്ഞ് സ്ഥലത്തെത്തിയ പോലീസും മോട്ടോർ വാഹന വകുപ്പ് ഉദ്യോഗസ്ഥരും നാട്ടുകാരുടെ സഹായത്തോടെയാണ് ഉടനടി രക്ഷാപ്രവർത്തനം നടത്തിയത്. അപകടത്തെക്കുറിച്ച് പമ്പ പൊലീസ് വിശദമായ അന്വേഷണം ആരംഭിച്ചിട്ടുണ്ട്.
