കോഴിക്കോട് : കോഴിക്കോട് ഫാറൂഖ് കോളേജ് സ്നേഹതീരംഭവനം വൃദ്ധ സദനത്തിൽ വെച്ച് മരണപ്പെട്ട സുരേന്ദ്ര പണിക്കർ എന്നയാളുടെ മൃതദേഹം തിരിച്ചറിഞ്ഞു. മരിച്ചത് ചിറ്റാര് കൊച്ചുകോയിക്കല് എസ്.എന്.ഡി.പി സ്കൂളിനു സമീപം പുന്നക്കുഴിയില് വീട്ടില് സുരേന്ദ്ര പണിക്കർ ആണെന്ന് സോഷ്യൽ മീഡിയയിൽ പങ്കുവെച്ച ഫോട്ടോ കണ്ട് അദ്ദേഹത്തിന്റെ ഭാര്യയും മക്കളും തിരിച്ചറിയുകയായിരുന്നു. ജൂലൈ നാലാം തീയതിയായിരുന്നു ഇദ്ദേഹം മരണപ്പെട്ടത്. എട്ടുവര്ഷം മുമ്പ് കാണാതെപോയതാണ് ഇദ്ദേഹത്തെ. സ്നേഹതീരംഭവനം വൃദ്ധ സദനത്തിൽ അടുത്ത നാളിലാണ് ഇദ്ദേഹം അന്തേവാസിയായത്. അതുകൊണ്ടുതന്നെ പത്തനംതിട്ട സ്വദേശിയാണെന്ന് മാത്രമേ അറിവുണ്ടായിരുന്നുള്ളൂ.
ബന്ധുക്കളെ കണ്ടെത്താമെന്ന പ്രതീക്ഷയില് മൃതദേഹം ഇത്രയും ദിവസം കോഴിക്കോട് മെഡിക്കൽ കോളേജ് മോർച്ചറിയിൽ സൂക്ഷിച്ചിരിക്കുകയായിരുന്നു. നാളെ രാവിലെ മൃതദേഹം ഏറ്റുവാങ്ങാനായി ബന്ധുക്കള് കോഴിക്കോട് സ്നേഹതീരത്ത് എത്തും. നിയമ നടപടികൾക്ക് ശേഷം മൃതദേഹം ബന്ധുക്കൾക്ക് കൈമാറും.
