പത്തനംതിട്ട : നഗരത്തില് പലയിടങ്ങളിലായി ഉപേക്ഷിക്കപ്പെട്ടതും പൊട്ടിവീണ് കിടക്കുന്നതുമായ കേബിള് വയറുകള് വാഹനയാത്രക്കാര്ക്കും കാല്നട യാത്രക്കാര്ക്കും ഒരുപോലെ ഭീഷണിയാകുന്നു. ഇലക്ട്രിക് പോസ്റ്റുകളില് ആണ് ഇത്തരത്തില് കേബിളുകള് വലിച്ചിട്ടുള്ളത്. പത്തനംതിട്ട പോലീസ് സ്റ്റേഷന് റോഡില് നിലവില് കുടുംബ കോടതിയും ഫാസ്റ്റ് ട്രാക്ക് കോടതിയും പ്രവര്ത്തിക്കുന്ന ഷൈന് ടവര് എന്ന കെട്ടിട സമുശ്ചയത്തിലേക്ക് കയറുന്ന വഴിയിലാണ് വാഹനയാത്രക്കാരെ വീഴ്ത്താനെന്ന തരത്തില് കേബിള് വയറുകള് റോഡിലേക്ക് വീണ് കുടക്കുന്നത്. ഇരുചക്ര വാഹനയാത്രക്കാര് ഇതില് കുരുങ്ങി അപകടങ്ങള് സംഭവിക്കാനുള്ള സാധ്യത വളരെയേറെയാണ്. ഇവിടെ മാത്രമല്ല ഇത്തരത്തിലുള്ള അപകടക്കെണികളുള്ളത്. പത്തനംതിട്ട അബാന് ജംഗ്ഷന്, ജനറല് ആശുപത്രി റോഡ്, മൈലപ്ര റോഡ് തുടങ്ങി പല റോഡുകളിലും കേബിളുകള് ഇത്തരത്തില് അപകടമായി കിടക്കുന്നത് കാണാം.
ടെലഫോണ് കേബിളുകളും ടെലിവിഷന് കേബിളുകളും ഇതില് ഉള്പ്പെടുന്നുണ്ട്. വാഹനങ്ങള് തട്ടിയും അല്ലാതെയും കേബിളുകള് റോഡില് വീണ് മാസങ്ങളോളം അപകടാവസ്ഥയില് കിടന്നാലും ആരും തിരിഞ്ഞുനോക്കാറില്ല. പലപ്പോഴും ഇത് നാട്ടുകാര് തന്നെ എടുത്ത് മാറ്റുകയാണ് ചെയ്യുന്നത്. ചെറിയ കേബിള് വള്ളികള് റോഡിലേക്ക് അപകടകരമാം വിധം ഇറങ്ങി കിടന്നാല് കാണുവാന് തന്നെ പ്രയാസകരമാണ്. ഇത്തരത്തില് നിരവധി ആളുകള്ക്കാണ് വാഹനാപകടങ്ങള് സംഭവിച്ചിട്ടുള്ളത്. ഇത്തരം സംഭവങ്ങള് ശ്രദ്ധയില്പ്പെട്ടാല് നാട്ടുകാര് ബന്ധപ്പെട്ടവരെ അറിയിച്ചാലും ആരും തിരിഞ്ഞു നോക്കാറില്ല. നടപ്പാതകളില് കേബിളുകള് അലക്ഷ്യമായി ഉപേക്ഷിച്ചിരിക്കുന്നതും കാണാം. കാലങ്ങളായി തുടരുന്ന ഈ പ്രവണതയ്ക്ക് എതിരെ യാതൊരു നടപടികളും സ്വീകരിക്കാന് ബന്ധപ്പെട്ടവര് ഇതുവരെ തയ്യാറായിട്ടുമില്ല.
