തിരുവല്ല: ആംബുലന്സിലെ ഓക്സിജന് തീര്ന്നതിനെ തുടര്ന്ന് ശ്വാസം കിട്ടാതെ രോഗി മരിച്ചു. തിരുവല്ലയില് നിന്ന് ആലപ്പുഴ മെഡിക്കല് കോളജിലേക്ക് കൊണ്ടുപോയ തിരുവല്ല സ്വദേശി രാജന് (67) ആണ് ഓക്സിജന് കിട്ടാതെ ശ്വാസംമുട്ടി മരിച്ചത്. പനി ബാധിച്ച് രാത്രി തിരുവല്ല താലൂക്ക് ആശുപത്രിയില് പ്രവേശിപ്പിച്ച രാജനെ ശ്വാസതടസം കൂടിയതിനാല് വണ്ടാനം മെഡിക്കല് കോളജ് ആശുപത്രിയിലേക്ക് റഫര് ചെയ്തു.
താലൂക്ക് ആശുപത്രിയിലെ ആംബുലന്സിലാണ് കൊണ്ടുപോയത്. കാഷ്വാലിറ്റിയില് വെച്ച് ഘടിപ്പിച്ച ഓക്സിജന് സിലിണ്ടര് ഇടയ്ക്കുവെച്ച് മാറ്റി ആംബുലന്സ് ഡ്രൈവര് മറ്റൊരു സിലിണ്ടര് ഘടിപ്പിച്ചെന്ന് രാജന്റെ മകന് ഗിരീഷ് പറഞ്ഞു. മൂന്നുകിലോമീറ്റര് പിന്നിട്ടപ്പോള്ത്തന്നെ ശ്വാസതടസം വര്ധിച്ചു. സ്വകാര്യ ആശുപത്രിയില് പ്രവേശിപ്പിക്കാന് ആവശ്യപ്പെട്ടിട്ടും ഡ്രൈവര് അനുവദിച്ചില്ലെന്നും ഗിരീഷ് ആരോപിച്ചു. വണ്ടാനം മെഡിക്കല് കോളജില് എത്തിക്കുമ്പോഴേക്കും രാജന് മരിച്ചു.