നെടുങ്കണ്ടം: സ്വാതന്ത്ര്യത്തിന്റെ 75-ാം വാര്ഷികത്തില് സി.പി.എം പോഷകസംഘടനകളുടെ നേതൃത്വത്തില് നടത്തിയ പരിപാടിയില് ദേശീയ പതാകയ്ക്ക് സ്ഥാനമില്ല. സ്വാതന്ത്ര്യ ദിനാഘോഷത്തോടനുബന്ധിച്ച് സിഐടിയു, കര്ഷക സംഘം, കര്ഷക തൊഴിലാളി യൂണിയന് എന്നിവയുടെ നേതൃത്വത്തില് നെടുങ്കണ്ടത്ത് നടത്തിയ പരിപാടിയിലാണ് ചെങ്കൊടി മാത്രം ഏന്തി റാലി നടത്തിയത്.
ജില്ലാ തലത്തില് നടത്തിയ പരിപാടിയില് സി.പി.എം ജില്ലാ സെക്രട്ടറി സി.വി.വര്ഗ്ഗീസ്, സംസ്ഥാന സെക്രട്ടറിയേറ്റംഗം കെ.കെ.ജയചന്ദ്രന് അടക്കം പങ്കെടുത്തിരുന്നു. എം.എം.മണി എംഎല്എ ആണ് പരിപാടി ഉദ്ഘാടനം ചെയ്തത്. ഉത്ഘാടന പ്രസംഗത്തില് ആര്എസ്എസ് ന്റെത് കപട രാജ്യ സ്നേഹമാണെന്നും മണി പറഞ്ഞിരുന്നു. ഇത് പാര്ട്ടി പരിപാടിയോ അതോ സ്വാതന്ത്ര്യദിന പരിപാടിയോ എന്ന തരത്തില് സാമൂഹിക മാധ്യമങ്ങളില് അടക്കം പ്രതിഷേധം ഉയര്ന്നിട്ടുണ്ട്.
സ്വാതന്ത്ര്യദിനത്തിന്റെ പേരില് സിപിഎം നെടുങ്കണ്ടത്ത് നടത്തിയ പരിപാടിയില് ദേശീയപതാക ഉപയോഗിക്കാത്തത് സിപിഎമ്മിന്റെ കപട രാജ്യ സ്നേഹത്തിന്റെ അവസാനത്തെ ഉദാഹരണമാണന്ന് മുന് ഡിസിസി പ്രസിഡന്റ് അഡ്വ. ഇബ്രാഹിംകുട്ടി കല്ലാര് പറഞ്ഞു. കൊട്ടി ഘോഷിച്ച് സ്വാതന്ത്ര്യ ആഘോഷ പരിപാടി സംഘടിപ്പിക്കുമ്പോഴും ദേശീയ പതാകയെ അപമാനിച്ചതില് മുന് മന്ത്രി കൂടിയായ എം.എം.മണി നേതൃത്വം കൊടുത്തത് അപമാനമാണെന്നും കല്ലാര് പറഞ്ഞു.