പീരുമേട്: തോട്ടം മേഖലയിലെ കുട്ടികളുടെ എക ആശ്രയമായ കരടിക്കുഴി എൽ.പി സ്കൂളില് അധ്യാപകരും കുട്ടികളും കുരങ്ങൻമാരെക്കൊണ്ട് പൊറുതിമുട്ടി. 243 കുട്ടികളും 13 അധ്യപക അനധ്യാപകരുമുള്ള സ്കൂളിന്റെ പ്രവർത്തനം കുരങ്ങൻമാർ മൂലം തടസ്സപ്പെടുകയാണ്. രാവിലെ കുട്ടികൾക്ക് പ്രഭാത ഭക്ഷണം നൽകുമ്പോഴും ഉച്ചഭക്ഷണ സമയത്തുമാണ് കുരങ്ങൻമാരുടെ വിളയാട്ടം കൂടുതല്. കൂട്ടമായി എത്തുന്ന കുരങ്ങൻമാർ കുട്ടികളെ ഭയപ്പെടുത്തി അവരുടെ മുമ്പിലെ ഭക്ഷണം തട്ടിയെടുക്കും.
പ്രവർത്തന മികവിൽ ധാരാളം പുരസ്കാരങ്ങൾ നേടിയിട്ടുള്ള സ്കൂളിലെ കുട്ടികൾ നിർമ്മിച്ച കലാരൂപങ്ങളും പൂന്തോട്ടം, പച്ചക്കറി കൃഷിതോട്ടവും കുരങ്ങന്മാര് നശിപ്പിച്ചു. ഓഫിസ്, ക്ലാസ് മുറികൾക്കുള്ളിലും ഇവ വിരാജിക്കുന്നു. വനം വകുപ്പിൽ പരാതി നൽകിയെങ്കിലും അവർ കൈമലർത്തുകയാണ്. എത്രയും വേഗം കുരങ്ങുകളെ തുരത്തി പിഞ്ചുകുഞ്ഞുങ്ങൾക്ക് സമാധാനമായി പഠിക്കാനുള്ള സാഹചര്യം ഒരുക്കണമെന്ന് പി.ടി.എ ആവശ്യപ്പെട്ടു.
