പത്തനംതിട്ട : പെരുമ്പെട്ടി പട്ടയ വിതരണ നടപടികള്‍ക്ക് നാഴികക്കല്ലാവുന്ന ഡിജിറ്റല്‍ സര്‍വേയുടെ ക്യാമ്പ് ഓഫീസിന്റെ ഉദ്ഘാടനം 28ന് വൈകിട്ട് അഞ്ചിന് പെരുമ്പെട്ടിയില്‍ റവന്യൂ മന്ത്രി കെ. രാജന്‍ നിര്‍വഹിക്കും. 512 കുടുംബങ്ങള്‍ക്കാണ് പെരുമ്പെട്ടി വില്ലേജില്‍ പട്ടയം ലഭിക്കാനുള്ളത്. മുന്‍പ് വനം റവന്യൂ വകുപ്പുകള്‍ സംയുക്തമായി നടത്തിയ സര്‍വേയില്‍ ഇവരുടെ ഭൂമി വനാതിര്‍ത്തി കാണിക്കുന്ന ജണ്ടയ്ക്ക് പുറത്താണെന്ന് കണ്ടെത്തിയിരുന്നു. 2019 ല്‍ ഇത് സംബന്ധിച്ച് അന്നത്തെ ഡിഎഫ്ഒ ഇടക്കാല റിപ്പോര്‍ട്ടും പുറത്തിറക്കിയിരുന്നു. തുടര്‍ന്ന് കേന്ദ്ര വനം മന്ത്രാലയം ഇത് അംഗീകരിക്കാന്‍ തയ്യാറായില്ല. ഇതോടെ സര്‍വേ നടപടികള്‍ നിര്‍ത്തി വയ്ക്കുകയായിരുന്നുവെന്ന് റാന്നി എംഎല്‍എ അഡ്വ .പ്രമോദ് നാരായണ്‍ അറിയിച്ചു.
പെരുമ്പെട്ടിയിലെ കൈവശ കര്‍ഷകര്‍ക്ക് പട്ടയം നല്‍കണമെന്ന് അദ്ദേഹം നിരവധി തവണ നിയമ സഭയില്‍ സബ്മിഷനിലൂടെയും ചോദ്യങ്ങളിലൂടെയും ഉന്നയിച്ചിരുന്നു. കൈവശ കര്‍ഷകര്‍ക്ക് പട്ടയം നല്‍കുന്നതിന് തടസങ്ങളില്ലെന്നും ഡിജിറ്റല്‍ സര്‍വേ ഉള്‍പ്പെടെയുള്ള തുടര്‍ നടപടികള്‍ ഉടന്‍ ആരംഭിക്കുവാന്‍ നടപടികള്‍ സ്വീകരിക്കുമെന്നും റവന്യൂ മന്ത്രി ബജറ്റ് സമ്മേളനത്തില്‍ ഉറപ്പ് നല്‍കിയിരുന്നു. ഇതിനെ തുടര്‍ന്ന് ഉന്നതതല ഉദ്യോഗസ്ഥരുടെ യോഗം വിളിച്ചുചേര്‍ത്ത് ഡിജിറ്റല്‍ സര്‍വേ നടപടികള്‍ ഉടന്‍ ആരംഭിക്കാന്‍ നിര്‍ദ്ദേശം നല്‍കുകയായിരുന്നു. ഇതിന്റെ അടിസ്ഥാനത്തിലാണ് പെരുമ്പെട്ടിയില്‍ ഡിജിറ്റല്‍ സര്‍വേ ക്യാമ്പ് ഓഫീസ് പ്രവര്‍ത്തനം ആരംഭിക്കുന്നത്. സര്‍വേ നടപടികള്‍ പൂര്‍ത്തിയാകുന്ന മുറയ്ക്ക് പട്ടയം ലഭിക്കുന്നതിനുള്ള മറ്റ് നടപടികളും പൂര്‍ത്തീകരിക്കാന്‍ വേണ്ട നിര്‍ദ്ദേശം ഉദ്യോഗസ്ഥര്‍ക്ക് നല്‍കിയിട്ടുണ്ടെന്നും റവന്യു മന്ത്രി അറിയിച്ചതായി എംഎല്‍എ പറഞ്ഞു.
