പത്തനംതിട്ട : വെള്ളപ്പൊക്കത്തിൽ നിരന്തരം തീരമിടിയുന്ന അച്ചൻകോവിലാറിന്റെ വശങ്ങൾ അടിയന്തിരമായി കെട്ടുവാൻ നടപടി സ്വീകരിക്കണമെന്നാവശ്യപ്പെട്ട് ഡിസിസി വൈസ് സിഡൻറും മുൻ നഗരസഭാ ചെയർമാനുമായ അഡ്വ.എ .സുരേഷ് കുമാർ ജില്ലാ കളക്ടർ ഡോ. ദിവ്യ എസ്. അയ്യർക്ക് നിവേദനം നൽകി. കഴിഞ്ഞ കുറെ വർഷമായി തുടർച്ചയായി ഉണ്ടായി കൊണ്ടിരിക്കുന്ന വെള്ളപ്പൊക്കത്തിൽ അച്ചൻകോവിലാറിന്റെ തീരം ഇടിഞ്ഞു കൊണ്ടിരിക്കുകയാണ്.
നിരവധി കുടുംബങ്ങളുടെ ആറ്റുതീരത്തുള്ള വീടുകൾ നദിയിലേക്ക് പതിക്കുന്ന തരത്തിൽ തിട്ട ഇടിഞ്ഞു കഴിഞ്ഞു. റവന്യു അധികാരികൾ ഇക്കാര്യത്തിൽ യാതൊന്നും ശ്രദ്ധിക്കുന്നില്ല. വലഞ്ചുഴി നടപ്പാലത്തിന്റെ കൈവരികൾ തിട്ട ഇടിഞ്ഞതിനെ തുടർന്ന് അപകടാവസ്ഥയിലാണ്. ഇവിടെ കോൺക്രീറ്റ് ഉപയോഗിച്ച് തീരം കെട്ടണം. ലക്ഷങ്ങളുടെ ഫണ്ടുണ്ടെങ്കിലെ ഇത് ചെയ്യാൻ കഴിയൂ. സ്ഥലം സന്ദർശിച്ച് ഇക്കാര്യത്തിൽ നടപടി സ്വീകരിക്കണമെന്നും നിവേദനത്തിൽ ആവശ്യപ്പെടുന്നുണ്ട്.
