പത്തനംതിട്ട : ഇന്ധനവില വർദ്ധനവിനെതിരെയും പാചകവാതക സബ്സിഡി വിതരണം നിർത്തലാക്കിയതിനെതിരെയും വേറിട്ട പ്രതിഷേധവുമായി പത്തനംതിട്ട ജില്ല അസംഘടിത തൊഴിലാളി കോൺഗ്രസ്. പാളയിൽ യാത്രചെയ്തും, ഉന്ത് വണ്ടി തള്ളിയും, വാഹനം കെട്ടി വലിച്ചും, ഗ്യാസ് സിലണ്ടർ ചുമന്നും, സൈക്കിൾ ചവിട്ടിയും നടത്തിയ പ്രതിഷേധം ജനശ്രദ്ധയാകര്‍ഷിച്ചു.
പാളയിൽ യാത്രചെയ്താണ് കേന്ദ്ര സർക്കാരിനോടുള്ള പ്രതിഷേധം ഇവർ വ്യക്തമാക്കിയത്. വാഹനമോടിക്കുന്നവരെ മാത്രമല്ല, സാധാരണക്കാരെക്കൂടെ ബാധിക്കുന്ന ഇന്ധനവിലയിലുണ്ടാകുന്ന വലിയ വ്യതിയാനം സാമൂഹിക അന്തരീക്ഷത്തിൽ അസമത്വം സൃഷ്ടിക്കുമെന്നും പ്രതിഷേധം ഉദ്ഘാടനം ചെയ്തുകൊണ്ട് ദേശീയ അസംഘടിത തൊഴിലാളി കോൺഗ്രസ് സംസ്ഥാന സെക്രട്ടറി നഹാസ് പത്തനംതിട്ട പറഞ്ഞു.
നിയോജക മണ്ഡലം പ്രസിഡന്റ് ജിതിൻ രാജ് അദ്ധ്യക്ഷത വഹിച്ചു. ജില്ലാ കമ്മറ്റിയംഗം ജിബിൻ ചിറക്കടവിൽ, ഫിനോ ഡിജോ എബ്രഹാം, ആൽവിൻ വർഗീസ്, മുഹമ്മദ് സുഹൈൽ റ്റി റ്റി , ജോയൽ ഷാജി, അനസ് അസ്ഹർ, മുഹമ്മദ് റോഷൻ, ഷൈജു വലംഞ്ചുഴി, ജസ്റ്റിൻ തോമസ് മാത്യൂ എന്നിവർ സമരത്തിന്‌ നേതൃത്വം നൽകി.
