മൂന്നാര്: പെട്ടിമുടി മണ്ണിടിച്ചില്പ്പെട്ട 2 പേരുടെ മൃതദേഹം കൂടി ഇന്ന് നടത്തിയ തിരച്ചിലിനിടെ കണ്ടെത്തി. ഇതോടെ ദുരന്തത്തില് മരിച്ചവരുടെ എണ്ണം 51 ആയി. ഒരു പുരുഷന്റേയും സ്ത്രീയുടേയും മൃതദേഹമാണ് കണ്ടെത്തിയത്. സമീപത്തെ പുഴയില് നിന്നാണ് മൃതദേഹം ലഭിച്ചത്. ഇനി 19 പേരുടെ മൃതദേഹങ്ങള് കൂടി കണ്ടെത്താനുണ്ട്.
പെട്ടിമുടിയില് ദേശീയ ദുരന്ത നിവാരണ സേന, സംസ്ഥാന ദുരന്ത നിവാരണ അതോറിറ്റി, ഫയര്ഫോഴ്സ്, പോലീസ് തുടങ്ങിയവരാണ് രക്ഷാപ്രവര്ത്തനങ്ങള്ക്ക് നേതൃത്വം നല്കുന്നത്. പെട്ടിമുടി ആറിന്റെ ഇരുവശങ്ങളിലുമുള്ള 16 കിലോമീറ്റര് വിസ്തൃതിയിലാണ് പ്രധാനമായും തിരച്ചില് നടത്തുന്നത്.
ഇനി കണ്ടെത്താനുള്ളവരിലേറെയും കുട്ടികളാണ്. ദുരന്തം നടന്ന് അഞ്ച് ദിവസം ആയതുകൊണ്ട് തന്നെ കണ്ടെത്തുന്ന മൃതദേഹങ്ങള് അധികവും തിരിച്ചറിയാനാകാത്ത അവസ്ഥയിലാണ്. കനത്ത മഴയും വെള്ളക്കെട്ടും വലിയ പാറക്കൂട്ടങ്ങളും തിരച്ചില് ദുഷ്കരമാക്കുന്നുണ്ട്. ഇടുക്കി, കോട്ടയം ജില്ലാ കളക്ടര്മാരും രക്ഷാ പ്രവര്ത്തനത്തിന് നേതൃത്വം കൊടുക്കുന്ന ഉദ്യോഗസ്ഥരും ചേര്ന്ന് ഇന്ന് ഉച്ചയ്ക്ക് അവലോകന യോഗം ചേരും. ഇനിയും മൃതദേഹങ്ങള് കണ്ടെത്താനുള്ള സാഹചര്യത്തില് എങ്ങനെയാണ് രക്ഷാ പ്രവര്ത്തനം തുടരേണ്ടത് എന്നത് അടക്കമുള്ള കാര്യങ്ങളാണ് അവലോകന യോഗം ചര്ച്ച ചെയ്യുക.
