ചെന്നൈ : രാജമല പെട്ടിമുടി ദുരന്ത ബാധിതര്ക്ക് ധനസഹായം പ്രഖ്യാപിച്ച് തമിഴ്നാട് സര്ക്കാരും. മരിച്ചവരുടെ കുടുംബത്തിന് മൂന്ന് ലക്ഷം രൂപ വീതവും ഗുരുതരമായി പരിക്കേറ്റവര്ക്ക് ഒരുലക്ഷം രൂപ വീതവുമാണ് സഹായം. തമിഴ്നാട് മുഖ്യമന്ത്രി എടപ്പാടി പളനിസ്വാമിയാണ് സഹായധനം പ്രഖ്യാപിച്ചത്.
ഓഗസ്റ്റ് ഏഴിനാണ് രാജമല പെട്ടിമുടിയില് ഉരുള്പൊട്ടലുണ്ടാവുന്നത്. അപകടത്തില് 30 മുറികളുള്ള നാല് ലയങ്ങള് പൂര്ണമായും തകര്ന്നിരുന്നു. 80-ലേറെപ്പേരാണ് ഇതില് താമസിച്ചിരുന്നത്. 62 പേരുടെ മൃതദേഹങ്ങളാണ് ഇതുവരെ കണ്ടെത്തിയത്. മരണമടഞ്ഞവരുടെ കുടുംബാംഗങ്ങള്ക്ക് ആശ്വാസധനത്തിന്റെ ആദ്യഗഡുവായി അഞ്ച് ലക്ഷം രൂപ മുഖ്യമന്ത്രി പിണറായി വിജയനും പ്രഖ്യാപിച്ചിരുന്നു. ദുരന്തത്തിനിരയായവരുടെ മക്കള്ക്ക് തുടര് പഠനത്തിന്റെ ചെലവും പരിക്കേറ്റവരുടെ ചികിത്സാച്ചെലവും കേരള സര്ക്കാരാണ് വഹിക്കുന്നത്.
