തിരുവനന്തപുരം : വരാനിരിക്കുന്ന തെരഞ്ഞെടുപ്പിന് മുൻപ് കോൺഗ്രസിൽ നിന്നും ഒരു പ്രമുഖൻ ബിജെപിയിലേക്ക് പോകുമെന്ന് മുഖ്യമന്ത്രി പിണറായി വിജയൻ. ബിജെപിയെ നേരിടാൻ തക്കവണ്ണം ഒരു രാഷ്ട്രീയ ശക്തിയായി ഉയർന്നുവരാൻ ഇപ്പോഴത്തെ സാഹചര്യത്തിൽ കോൺഗ്രസിന് ആകില്ലെന്നും മുഖ്യമന്ത്രി കുറ്റപ്പെടുത്തി. ആറന്മുളയിൽ സിപിഎം കോഴഞ്ചേരി ഏരിയ കമ്മിറ്റിയുടെ പുതിയ ഓഫീസ് മന്ദിരം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കോൺഗ്രസിന്റെ പല പ്രമുഖ നേതാക്കളും ഇപ്പോൾ ബിജെപിയിലേക്ക് കൂറുമാറിക്കഴിഞ്ഞു. ആവശ്യമെങ്കിൽ ബിജെപിയിലേക്ക് പോകുമെന്ന് പറയുന്ന ഒരു കെപിസിസി അദ്ധ്യക്ഷനാണ് പാർട്ടിയ്ക്കുള്ളതെന്നും മുഖ്യമന്ത്രി പറഞ്ഞു. സ്വാതന്ത്ര്യ സമര കാലത്ത് എല്ലാവരുടേയും ലക്ഷ്യം രാജ്യത്തിന്റെ സ്വാതന്ത്ര്യമായിരുന്നു. എന്നാൽ ഇതിൽ നിന്നും വ്യത്യസ്തമായി നിന്നൊരു കൂട്ടരുണ്ട്. അവർ നമ്മുടെ രാജ്യത്ത് നിന്നും ബ്രിട്ടീഷുകാർ പോകേണ്ടതില്ലെന്ന നിലപാടെടുത്തു. സ്വാതന്ത്ര്യ സമരത്തിൽ പങ്കെടുത്ത് ആൻഡമാൻ ജയിലിൽ അടയ്ക്കപ്പെട്ട അതിലൊരാൾ ബ്രിട്ടീഷുകാർക്ക് മാപ്പ് എഴുതിക്കൊടുത്തു. അങ്ങനെ എഴുതി വന്ന ആളാണ് സവർക്കർ. അദ്ദേഹത്തെ വീര സവർക്കർ എന്നാണ് ഒരു കൂട്ടർ വിളിക്കുന്നത്. ഇവരുടെ മുൻഗാമികൾക്ക് സ്വാതന്ത്ര്യ സമരത്തിൽ ഒരു പങ്കും ഉണ്ടായിരുന്നില്ല.
അന്നത്തെ ആർഎസ്എസിന്റെ താത്വികാചാര്യനായിരുന്ന ഗോൾവാക്കർ പറഞ്ഞത്, വെറുതെ ബ്രിട്ടീഷുകാരോട് പൊരുതി ആരോഗ്യവും സമയവും കളയരുതെന്നാണെന്നും മുഖ്യമന്ത്രി പറഞ്ഞു. നിർഭാഗ്യവശാൽ നമ്മുടെ രാജ്യത്തിന്റെ ഭരണാധികാരം ഇവരുടെ പിൻഗാമികളുടെ കൈകളിലാണ്. ആർഎസ്എസ് ഇതിനെല്ലാം നേതൃത്വം നൽകുന്നു. അവർ രാജ്യത്തിന്റെ ഭരണഘടന അംഗീകരിക്കുന്നില്ല. മതാധിഷ്ഠിത രാഷ്ട്രമാണ് അവർ ആഗ്രഹിക്കുന്നത്. കേരളത്തെ സാമ്പത്തികമായി ഞെരുക്കി ശ്വാസം മുട്ടിക്കാനാണ് കേന്ദ്രസർക്കാർ ശ്രമിക്കുന്നതെന്നും മുഖ്യമന്ത്രി വിമർശിച്ചു.
