തിരുവനന്തപുരം: മൊബൈല് ഫോണ് മോഷ്ടിച്ചെന്ന് ആരോപിച്ച് എട്ട് വയസുകാരിയെ നടുറോഡില് പരസ്യമായി പിങ്ക് പോലീസ് ഉദ്യോഗസ്ഥ അധിക്ഷേപിച്ച സംഭവത്തില് നഷ്ടപരിഹാരത്തിന് ഉത്തരവിട്ട് സര്ക്കാര്. കോടതി നിര്ദ്ദേശിച്ച ഒന്നര ലക്ഷം രൂപയും കോടതി ചെലവായ 25,000 രൂപയും പോലീസ് ഉദ്യോഗസ്ഥയായ രജിതയില് നിന്നും ഈടാക്കും. നടുറോഡില് പോലീസ് അധിക്ഷേപത്തിന് ഇരയായ പെണ്കുട്ടിക്ക് നഷ്ടപരിഹാരം നല്കണമെന്ന ഹൈക്കോടതി ഉത്തരവിനെതിരെ സര്ക്കാര് അപ്പീല് പോയിരുന്നു. കുട്ടിക്കെതിരെ പോലീസ് ഉദ്യോഗസ്ഥയുടെ ജാതി അധിക്ഷേപമുണ്ടായിട്ടില്ലെന്നും അധിക്ഷേപിച്ച പോലീസ് ഉദ്യോഗസ്ഥ രജിതക്കെതിരെ വകുപ്പതല നടപടി എടുത്തെന്നുമായിരുന്നു സര്ക്കാര് അറിയിച്ചത്.
എന്നാല് സര്ക്കാര് വാദമെല്ലാം തള്ളിയ കോടതി ഒന്നര ലക്ഷം രൂപ നഷ്ടപരിഹാരം നല്കാന് ഉത്തരവിട്ടു. നഷ്ടപരിഹാര തുകയായ ഒന്നര ലക്ഷവും കോടതി ചെലവും പോലീസ് ഉദ്യോഗസ്ഥയില് നിന്നും ഈടാക്കാനാണ് ആഭ്യന്തര വകുപ്പ് ഉത്തരവ്. ഹൈക്കോടതി ഉത്തരവിട്ട് ആറ് മാസത്തിന് ശേഷമാണ് സര്ക്കാര് നടപടി. തോന്നക്കലില് വെച്ച് കഴിഞ്ഞ വര്ഷം ഓഗസ്റ്റ് 27നാണ് പെണ്കുട്ടിയെ മോഷണ കുറ്റം ആരോപിച്ച് പിങ്ക് പോലീസിലുണ്ടായിരുന്ന സിവില് പോലീസ് ഓഫീസര് രജിത അധിക്ഷേപിക്കുന്നത്. സംഭവത്തിന് പിന്നാലെ കോടതി നിര്ദ്ദേശത്തെ തുടര്ന്ന് യൂണിഫോം ജോലിയില് നിന്നും രജിതയെ മാറ്റി നിര്ത്തിയിട്ടുണ്ട്.
