തിരുവനന്തപുരം : കേരളത്തിൽ കോൺഗ്രസ് അധികാരത്തിൽ വന്നാൽ മുഖ്യമന്ത്രിയെ നിശ്ചയിക്കുന്നതുമായി ബന്ധപ്പെട്ട് നിർണ്ണായക പ്രതികരണവുമായി മുതിർന്ന കോൺഗ്രസ് നേതാവ് പി.ജെ കുര്യൻ. കോൺഗ്രസ് രാഷ്ട്രീയത്തിൽ ഡൽഹിയിൽ നിന്നും നേതാക്കൾ എത്തി മുഖ്യമന്ത്രിമാരായ ചരിത്രമുണ്ടെന്ന് അദ്ദേഹം ഓർമ്മിപ്പിച്ചു. മുഖ്യമന്ത്രി സ്ഥാനത്തേക്ക് പരിഗണിക്കപ്പെടുന്ന മൂന്ന് പേരും ഒരുപോലെ യോഗ്യരാണെന്നും അദ്ദേഹം പറഞ്ഞു. മുഖ്യമന്ത്രിയെ തീരുമാനിക്കുന്ന പ്രക്രിയയിൽ ഹൈക്കമാൻഡ് നിയോഗിക്കുന്ന നിരീക്ഷകർ എം.എൽ.എമാരുടെയും മുതിർന്ന നേതാക്കളുടെയും അഭിപ്രായം തേടുമെന്ന് കുര്യൻ വ്യക്തമാക്കി.
തനിക്കും നിർദ്ദേശിക്കാൻ ഒരു പേരുണ്ടെന്നും എന്നാൽ അത് മാധ്യമങ്ങളോട് വെളിപ്പെടുത്തില്ലെന്നും നിരീക്ഷകർ വരുമ്പോൾ അവരോട് മാത്രമേ പറയുകയുള്ളൂ എന്നും അദ്ദേഹം പറഞ്ഞു. നിലവിലെ ഒരു എം.എൽ.എ രാജിവെച്ച് വേണുഗോപാലിന് വഴിമാറുന്ന സാഹചര്യം വന്നാലും അത് പാർട്ടിയുടെ പൊതു താൽപ്പര്യത്തിനനുസരിച്ചായിരിക്കുമെന്നും അദ്ദേഹം സൂചിപ്പിച്ചു.
