എറണാകുളം: മഹാരാജാസ് കോളജ് വിദ്യാര്ത്ഥിയായ എസ്എഫ്ഐ സംസ്ഥാന സെക്രട്ടറി പി എം ആര്ഷോ പരീക്ഷ എഴുതാതെ വിജയിച്ചതായി പ്രഖ്യാപിക്കപ്പെട്ടതില് പ്രതികരിച്ച് മുന് വിദ്യാഭ്യാസ മന്ത്രി പി കെ അബ്ദുറബ്ബ്. പരീക്ഷാ സമയത്ത് ജയിലിലായിരുന്ന സഖാവിനെ ജയിപ്പിക്കാനും മാലോകരറിഞ്ഞാല് പിന്നെ തോല്പ്പിക്കാനും മാത്രം ടെക്നോളജി വികസിപ്പിച്ചിരിക്കുകയാണെന്ന് അദ്ദേഹം ഫേസ്ബുക്കില് കുറിച്ചു.
നിങ്ങള് ഞങ്ങളെ തോല്പ്പിച്ചോളൂ, പക്ഷെ അവസാനം തോല്ക്കുന്നത് നിങ്ങളായിരിക്കും എന്ന കവിതയൊക്കെ ഇക്കാലത്ത് പഴഞ്ചനാണെന്നും അദ്ദേഹം പരിഹസിച്ചു. ഈ വാക്കുകളെഴുതിയ പോസ്റ്റര് സഹിതമാണ് പരിഹാസം. അതേസമയം എഴുതാത്ത പരീക്ഷ പാസായെന്ന മാര്ക്ക് ലിസ്റ്റ് വിവാദത്തിനൊടുവില് തിരുത്തി. എംഎ ആര്ക്കിയോളജി മൂന്നാം സെമസ്റ്റര് പരീക്ഷയുടെ മാര്ക്ക് ലിസ്റ്റിലാണ് വിഷയങ്ങളും മാര്ക്കും ഇല്ലെങ്കിലും പാസായതായി രേഖപ്പെടുത്തിയത്.
