തിരുവനന്തപുരം: സംസ്ഥാനത്ത് ഈ വര്ഷത്തെ പ്ലസ് വണ് പ്രവേശനത്തിന് നാളെ മുതല് ഓണ്ലൈന് ആയി അപേക്ഷ സമര്പ്പിച്ചു തുടങ്ങാം.ഒന്നാം വര്ഷ ഹയര് സെക്കണ്ടറി /വൊക്കേഷണല് ഹയര് സെക്കണ്ടറി പ്രവേശനത്തിനുള്ള അപേക്ഷകള് നാളെ മുതല് ഏകജാലക പോര്ട്ടല് വഴി ഓണ്ലൈനായി സമര്പ്പിക്കാവുന്നതാണ്.അപേക്ഷകര്ക്ക് സ്വന്തമായോ, അല്ലെങ്കില് പത്താം തരം പഠിച്ചിരുന്ന ഹൈസ്കൂളിലെ കമ്പ്യൂട്ടർ ലാബ് സൗകര്യവും അദ്ധ്യാപകരുടെ സഹായവും അതുപോലെ തന്നെ ആ പ്രദേശത്തെ ഗവണ്മെന്റ് /എയ്ഡഡ് ഹയര്സെക്കണ്ടറി/ വൊക്കേഷണല് ഹയര് സെക്കണ്ടറി സ്കൂളുകളിലെ കമ്പ്യൂട്ടർ ലാബ് സൗകര്യവും അദ്ധ്യാപകരുടെ സഹായവും പ്രയോജനപ്പെടുത്തി പ്ലസ് വണ് പ്രവേശനത്തിനുള്ള അപേക്ഷകള് ഓണ്ലൈനായി സമര്പ്പിക്കാവുന്നതാണ്.
അപേക്ഷ ഓണ്ലൈനായി സമര്പ്പിക്കുവാനുമുള്ള അവസാന തീയതി ജൂലൈ 18 ആണ്. അപേക്ഷ സമര്പ്പണം ആരംഭിക്കുന്നതിന് മുന്പു തന്നെ ചില അക്ഷയ കേന്ദ്രങ്ങളില് അപേക്ഷാ ഫോം അച്ചടിച്ചു വിതരണം ചെയ്തിരുന്നതായും ഒരു അപേക്ഷ ഫോം സമര്പ്പിക്കാന് 140 രൂപ ഈടാക്കുന്നതായും പരാതി ഉയര്ന്നിട്ടുണ്ട്. കോഴ്സിന് ചേരുന്ന സമയത്ത് വിദ്യാര്ത്ഥി അടയ്ക്കേണ്ട ഫീസ് 25 രൂപയാണ്
ഈ വര്ഷത്തെ പ്ലസ് വണ് പ്രവേശനത്തിനുള്ള ആദ്യ അലോട്ട്മെന്റ് തീയതി ജൂലൈ 27 ആണ്. ഇതിനു മുന്നോടിയായുള്ള ട്രയല് അലോട്ട്മെന്റ് ജൂലൈ 21 വരും. മുഖ്യ ഘട്ടത്തിലെ അവസാന അലോട്ട്മെന്റ് തീയതി 2022 ആഗസ്റ്റ് 11 ആണ്. മുഖ്യ ഘട്ടത്തിലെ മൂന്ന് അലോട്ട്മെന്റുകളിലൂടെ ഭൂരിഭാഗം സീറ്റുകളില് പ്രവേശനം ഉറപ്പാക്കി 2022 ആഗസ്റ്റ് 17 ന് പ്ലസ് വണ് ക്ലാസ്സുകള് ആരംഭിക്കുന്നതാണ്.
മുഖ്യ ഘട്ടം കഴിഞ്ഞാല് പുതിയ അപേക്ഷകള് ക്ഷണിച്ച് സപ്ലിമെന്ററി അലോട്ട്മെന്റുകളിലൂടെ ശേഷിക്കുന്ന ഒഴിവുകള് നികത്തി 2022 സെപ്തംബര് 30 ന് പ്രവേശന നടപടികള് അവസാനിപ്പിക്കുന്നതായിരിക്കും. ഏകജാലക സംവിധാനത്തിന്റെ മുഖ്യ ഘട്ടത്തോടൊപ്പം രണ്ട് അലോട്ട്മെന്റുകളും ഒരു സപ്ലിമെന്ററി അലോട്ട്മെന്റും സ്പോര്ട്സ് ക്വാട്ടാ പ്രവേശനത്തിനായി ഉണ്ടായിരിക്കുന്നതാണ്.
സ്പോര്ട്ട്സ് ക്വാട്ട അഡ്മിഷന് രണ്ട് ഘട്ടങ്ങള് ഉള്പ്പെട്ട ഓണ്ലൈന് സംവിധാനത്തില് ആയിരിക്കും. ആദ്യ ഘട്ടത്തില് സ്പോര്ട്ട്സില് മികവ് നേടിയ വിദ്യാര്ഥികള് അവരുടെ സ്പോര്ട്സ് സര്ട്ടിഫിക്കറ്റുകള് അതാത് ജില്ലാ സ്പോര്ട്ട്സ് കൗണ്സിലുകളില് ഓണ്ലൈനായി രജിസ്റ്റര് ചെയ്യേണ്ടതാണ്. രണ്ടാം ഘട്ടത്തില് പ്ലസ് വണ് അഡ്മിഷന് യോഗ്യത നേടുന്ന വിദ്യാര്ഥികള് സ്പോര്ട്ട്സ് ക്വാട്ടയില് അഡ്മിഷന് ലഭിക്കുന്നതിനായി അവരുടെ അപേക്ഷ സ്കൂള്/ കോഴ്സുകള് ഓപ്ഷനായി ഉള്ക്കൊള്ളിച്ച് ഓണ്ലൈനായി സമര്പ്പിക്കണം. ഏകജാലക സംവിധാനത്തിന്റെ മുഖ്യ ഘട്ടത്തോടൊപ്പം രണ്ട് അലോട്ട്മെന്റുകളും ഒരു സപ്ലിമെന്ററി അലോട്ട്മെന്റും സ്പോര്ട്സ് ക്വാട്ടാ പ്രവേശനത്തിനായി ഉണ്ടായിരിക്കുന്നതാണ്.