കൊച്ചി: മൂന്നാംഘട്ട അലോട്ട്മെന്റ് ലിസ്റ്റ് കൂടി പ്രസിദ്ധീകരിച്ചതോടെ ജില്ലയിലെ പ്ലസ് വണ് പ്രവേശന പ്രക്രിയകള് അന്തിമ ഘട്ടത്തിലേക്ക്. നിലവിലെ കണക്കുകള് അനുസരിച്ച് 99.61ശതമാനം അലോട്ട്മെന്റും പൂര്ത്തിയായി. 125സീറ്റുകളാണ് മൂന്നാം ഘട്ട അലോട്ട്മെന്റ് പ്രസിദ്ധീകരിച്ചശേഷം ഇനി ഒഴിവുള്ളത്. ജനറല്- 118, ഈഴവ-രണ്ട്, മുസ്ലിം- ഒന്ന്, ഹിന്ദു ഒ.ബി.സി- ഒന്ന്, എസ്.സി-രണ്ട്, ഒ.ഇ.സി- ഒന്ന് എന്നിങ്ങനെയാണ് ഒഴിവുകള്.
3,504പേര്ക്ക് ഹയര് ഓപ്ഷന് ലഭിച്ചു. ഏകജാലക സംവിധാനത്തിലൂടെ മൂന്നാം ഘട്ടത്തില് 24,122 സീറ്റിലേക്കാണ് പ്രവേശനം നടക്കുന്നത്. താത്കാലികമായി പ്രവേശനം നേടിയവര്ക്ക് ഹയര് ഓപ്ഷന് നിലനിര്ത്താന് ഇനി അവസരമുണ്ടാകില്ലെന്നും അലോട്ട്മെന്റ് ലഭിച്ച എല്ലാ വിദ്യാര്ത്ഥികളും ഫീസടച്ച് 24ന് വൈകീട്ട് അഞ്ചിനുമുമ്പ് പ്രവേശനം നേടണമെന്നും അധികൃതര് അറിയിച്ചു.
അലോട്ട്മെന്റ് ലഭിച്ചിട്ടും പ്രവേശനം നേടാത്ത വിദ്യാര്ത്ഥികളെ സപ്ലിമെന്ററി അലോട്ട്മെന്റുകളില് പരിഗണിക്കില്ല.ജില്ലയില് പ്ലസ് വണ് പ്രവേശനത്തിന് 38,607 പേരാണ് അപേക്ഷ നല്കിയത്. മാനേജ്മെന്റ് സീറ്റും അണ് എയ്ഡഡ് സ്കൂളുകളിലെ സീറ്റും ഉള്പ്പെടെ 38,515 സീറ്റ് ജില്ലയിലുണ്ട്.
ഒന്നാംഘട്ട അലോട്ട്മെന്റ് ആഗസ്റ്റ് അഞ്ചിനും രണ്ടാം ഘട്ട അലോട്ട്മെന്റ് ആഗസ്റ്റ് 16,17 തീയതികളിലുമാണ് നടന്നത്. മൂന്നാം ഘട്ട അലോട്ട്മെന്റ് പൂര്ത്തിയാക്കി ഈ മാസം 25ന് തന്നെ ക്ലാസുകള് ആരംഭിക്കും. മൂന്നാം ഘട്ട അലോട്ട്മെന്റിനു ശേഷമുള്ള സപ്ലിമെന്ററി അലോട്ട്മെന്റുകളുടെ ഷെഡ്യൂള് പ്രഖ്യാപിച്ചിട്ടില്ല.
ഒറിജിനല് സീറ്റ്- 23,701
ആകെ സീറ്റ്- 24,122
അലോട്ട് ചെയ്തത്- 23,997
മൂന്നാം ഘട്ടില് പ്രവേശനം നേടിയത്- 6,274
ഹയര് ഓപ്ഷന് ലഭിച്ചത്- 3,504
ഒഴിവുള്ളത്- 125
അലോട്ട്മെന്റ് പൂര്ത്തിയായത്- 99.61
സീറ്റുകള്
(വിഷയം, ബാച്ചുകള്, സീറ്റ്, മെറിറ്റ് സീറ്റ്, മാനേജ്മെന്റ് സീറ്റ് എന്ന കണക്കില്)
സയന്സ്- 368- 21,638- 13,086- 2,292
ഹ്യുമാനിറ്റീസ്- 83- 5,029- 3,618- 588
കൊമേഴ്സ്- 200- 11,848- 7,650- 1,212
