ന്യൂഡല്‍ഹി : 75ാം സ്വാതന്ത്ര്യദിനത്തില്‍ ഗ്രാമപ്രദേശങ്ങളെ അടക്കം ബന്ധിപ്പിക്കുന്ന 75 വന്ദേ ഭാരത് ട്രെയിനുകളുടെ പ്രഖ്യാപനവുമായി പ്രധാനമന്ത്രി നരേന്ദ്രമോദി. ചെങ്കോട്ടയിലെ സ്വാതന്ത്ര്യദിന പ്രസംഗത്തിനിടെയാണ് പ്രധാനമന്ത്രിയുടെ വാഗ്‌ദാനം. ‘സ്വാതന്ത്ര്യത്തിന്‍റെ അമൃത് മഹോത്സവത്തിന്‍റെ 75 ആഴ്ചകളില്‍ രാജ്യത്തിന്‍റെ എല്ലാ കോണുകളെയും ബന്ധിപ്പിക്കുന്ന 75 വന്ദേഭാരത് ട്രെയിന്‍ സര്‍വിസുകള്‍ ആരംഭിക്കാനാണ് തീരുമാനം. ഇത് ഉഡാന്‍ വിമാന സര്‍വീസിന് സമാനമാകും.
ആഭ്യന്തര വിമാന സര്‍വിസുകള്‍ പ്രോത്സാഹിപ്പിക്കുന്നതിനായി നടപ്പാക്കിയ ട്രെയിന്‍ സര്‍വിസുകള്‍ ഗ്രാമങ്ങളും നഗരങ്ങളും തമ്മിലുള്ള അന്തരം കുറക്കുക എന്ന ലക്ഷ്യമാണ് മുന്നോട്ട് വെയ്ക്കുന്നത്. വനിതകള്‍ക്ക് എല്ലാ മേഖലകളിലും തുല്യത ഉറപ്പാക്കുമെന്നും, സൈനിക സ്കൂളുകളില്‍ പെണ്‍കുട്ടികള്‍ക്കും പ്രവേശനം നല്‍കുമെന്നും മോദി കൂട്ടിച്ചേര്‍ത്തു. വിശിഷ്ടാതിഥികളായി ചെങ്കോട്ടയില്‍ എത്തിയ ഒളിമ്പിക്സ് താരങ്ങളെ പ്രധാനമന്ത്രി അഭിനന്ദിച്ചു. 75ാം സ്വാതന്ത്ര്യ ദിനാഘോഷത്തിന്‍റെ ഭാഗമായി രാജ്യത്തിന്‍റെ വ്യത്യസ്‌ത ഇടങ്ങളിലായി വിവിധ പദ്ധതികളാണ് ആസൂത്രണം ചെയ്തിരിക്കുന്നത്.
