കൊച്ചി: പ്രധാനമന്ത്രി നരേന്ദ്ര മോദിയുടെ സന്ദര്‍ശനത്തെ തുടര്‍ന്ന് നേവല്‍ ബേസ്, വാത്തുരുത്തി, ബി.ഒ.ടി ഈസ്റ്റ്, തേവര ഫെറി ജങ്ഷന്‍, കുണ്ടന്നൂര്‍, സീപോര്‍ട്ട്- എയര്‍പോര്‍ട്ട് റോഡ് എന്നീ ഭാഗങ്ങളില്‍ ഞായറാഴ്ച ഉച്ചക്ക് 12 മുതല്‍ രാത്രി ഏഴുവരെ ഗതാഗത നിയന്ത്രണമുണ്ടായിരിക്കുമെന്ന് സിറ്റി പോലീസ് അറിയിച്ചു.
എറണാകുളം നഗരത്തില്‍നിന്ന് പശ്ചിമ കൊച്ചിയിലേക്കുപോകേണ്ട വാഹനങ്ങള്‍ എസ്.എ റോഡ്, വൈറ്റില, കുണ്ടന്നൂര്‍ മേല്‍പാലം, അരൂര്‍, ഇടക്കൊച്ചി വഴി പോകണം. പശ്ചിമ കൊച്ചിയില്‍നിന്ന് എറണാകുളം, ആലപ്പുഴ ഭാഗങ്ങളിലേക്ക് പോകേണ്ട വാഹനങ്ങള്‍ ഇടക്കൊച്ചി, അരൂര്‍ വഴി പോകണം. എറണാകുളം നഗരത്തില്‍നിന്ന് പശ്ചിമ കൊച്ചിയിലേക്കും തിരിച്ചും പോകേണ്ട വാഹനങ്ങള്‍ക്ക് ഗോശ്രീ റോഡ്, വൈപ്പിന്‍ വഴിയുള്ള ജങ്കാര്‍ സര്‍വിസ് എന്നിവ പ്രയോജനപ്പെടുത്താം.
സീപോര്‍ട്ട്- എയര്‍പോര്‍ട്ട് റോഡില്‍ ഗതാഗത നിയന്ത്രണം ഉള്ളതിനാല്‍ കളമശ്ശേരി, കാക്കനാട് എന്നീ ഭാഗങ്ങളില്‍നിന്ന് ഈ റോഡിലൂടെ തൃപ്പൂണിത്തുറ ഭാഗത്തേക്ക് പോകേണ്ട വാഹനങ്ങള്‍ കാക്കനാട് സിഗ്‌നല്‍ ജങ്ഷനില്‍നിന്ന് പാലാരിവട്ടം ബൈപാസിലെത്തി യാത്ര തുടരണം. കാക്കനാട് പാര്‍ക്ക് റെസിഡന്‍സി ഹോട്ടലിന് മുന്നിലുള്ള റോഡിലൂടെ യാത്ര ചെയ്യേണ്ടവരും ഇതുവഴി പോകണം.
കരിമുകള്‍ ജങ്ഷനില്‍ അമ്പലമുകള്‍ ഭാഗത്തേക്ക് നിയന്ത്രണമുള്ളതിനാല്‍ ആലുവ- പെരുമ്പാവൂര്‍- വണ്ടര്‍ലാ- പള്ളിക്കര ഭാഗത്ത് നിന്നുവരുന്ന വാഹനങ്ങള്‍ കരിമുകള്‍ ജങ്ഷനില്‍നിന്ന് ഇടത്തോട്ട് തിരിഞ്ഞ് പീച്ചിങ്ങാച്ചിറ ജങ്ഷനിലെത്തി അവിടെനിന്നും പുത്തന്‍കുരിശ് വഴി തിരുവാങ്കുളത്തെത്തി യാത്ര തുടരണം.
പീച്ചിങ്ങാച്ചിറ ജങ്ഷനില്‍നിന്ന് കരിമുകള്‍ ഭാഗത്തേക്കും ഹില്‍പാലസിന് മുന്നില്‍നിന്ന് അമ്പലമുകള്‍ ഭാഗത്തേക്കും കരിങ്ങാച്ചിറ ജങ്ഷനില്‍നിന്ന് ഇരുമ്പനം ജങ്ഷന്‍ ഭാഗത്തേക്കും എരൂര്‍ ഭാഗത്തുനിന്ന് ഇരുമ്പനം ഭാഗത്തേക്കും ഗതാഗതം അനുവദിക്കില്ല.
എരൂര്‍ ഭാഗത്തുനിന്ന് എസ്.എന്‍ ജങ്ഷനിലേക്ക് വരുന്നവര്‍ ഇവിടെനിന്ന് കിഴക്കേ കോട്ടയിലെത്തി യാത്ര തുടരണം. എസ്.എന്‍ ജങ്ഷന്‍ ഭാഗത്തുനിന്ന് സീപോര്‍ട്ട് എയര്‍പോര്‍ട്ട് റോഡ്, കരിങ്ങാച്ചിറ, ഇരുമ്പനം ജങ്ഷന്‍, അമ്പലമുകള്‍ എന്നീ ഭാഗങ്ങളിലേക്ക് ഗതാഗതം അനുവദിക്കില്ല. തിരുവാങ്കുളം ഭാഗത്തു നിന്ന് കാക്കനാട്, എറണാകുളം ഭാഗത്തേക്ക് പോകേണ്ട വാഹനങ്ങള്‍ കിഴക്കേകോട്ട മിനി ബൈപാസ്, വൈറ്റിലവഴി തിരിഞ്ഞുപോകണം.
