കായംകുളം : വാടകക്ക് വിളിച്ച കാര് തട്ടിയെടുത്ത് ഓടിച്ച് പോകുന്നതിനിടെ നിയന്ത്രണംവിട്ട് മൂന്ന് വാഹനങ്ങളില് ഇടിച്ചു. കാര് തട്ടിയെടുത്ത കണ്ണൂര് ഇരിട്ടി സ്വദേശി അര്ജുനെ (24) ഓച്ചിറയില് നാടകീയ രംഗങ്ങള്ക്കിടയില് പോലീസ് പിടികൂടി.
തിരുവനന്തപുരം തൈക്കാട് ചാരുവിളാകത്ത് പുത്തന്വീട്ടില് അരുണിന്റെ (30) ടാക്സി കാറില് ശനിയാഴ്ച ഉച്ചക്ക് കണ്ണൂരേക്ക് യാത്ര ചെയ്യുകയായിരുന്നു അര്ജുന്. വൈകിട്ട് ആറിന് ദേശീയ പാതയില് വവ്വാക്കാവിന് തെക്ക് ഭാഗത്ത് എത്തിയതോടെ കാര് നിര്ത്തി അരുണ് മൊബൈല് ചാര്ജര് വാങ്ങാന് പുറത്തിറങ്ങി. എ.സി ഓഫാകാതിരിക്കാന് താക്കോല് കാറില്നിന്ന് എടുത്തിരുന്നില്ല. ഈ സമയം അര്ജുന് കാറുമായി കടന്നു. അരുണ് മറ്റൊരു വാഹനത്തില് പിന്നാലെ പാഞ്ഞു.
ഓച്ചിറ പ്രീമിയര് ജങ്ഷന് വടക്കുഭാഗത്ത് വെച്ച് തട്ടിയെടുത്ത കാറിന് മുന്നിലെത്തിയതോടെ അര്ജുന് കാര് നിര്ത്തി. അരുണ് പുറത്തിറങ്ങിയതോടെ അര്ജുന് വീണ്ടും കാര് അമിതവേഗത്തില് മുന്നോട്ടെടുത്തു. സമീപത്തുകൂടി കടന്നുവന്ന തിരുവനന്തപുരം സ്വദേശി തോമസ്, കായംകുളം കൃഷ്ണപുരം സ്വദേശി ഷാനവാസ് എന്നിവരുടെ കാറുകളും മറ്റൊരു വാഹനവും ഇടിച്ച് തെറിപ്പിച്ചതോടെ അര്ജുന് ഓടിച്ച കാര് വശത്തേക്ക് മറിഞ്ഞു. നിസ്സാര പരിക്കേറ്റ അര്ജുനെ ഓച്ചിറ പോലീസെത്തി കസ്റ്റഡിയിലെടുത്ത് കായംകുളം പോലീസിന് കൈമാറി. യുവാവ് ലഹരി ഉപയോഗിച്ചിരുന്നതായാണ് പ്രാഥമിക വിവരം.
