കൊല്ലം : യുവതിക്കു നേരെയുണ്ടായ അതിക്രമത്തില്‍ വിചിത്ര നടപടിയുമായി പോലീസ്. യുവതിയെ ആക്രമിച്ചയാളെ അറസ്റ്റ് ചെയ്യാതെ അതിക്രമം ചോദ്യം ചെയ്തയാളെ പോലീസ് അറസ്റ്റ് ചെയ്തു. ശക്തികുളങ്ങര പോലീസിനെതിരെയാണ് ഗുരുതര ആരോപണം ഉയര്‍ന്നത്. പോലീസിനെതിരെ പരാതിയുമായി യുവതി മുഖ്യമന്ത്രിയെ സമീപിച്ചു. സിറ്റി പോലീസ് കമ്മീഷണര്‍ക്കും യുവതി പരാതി നല്‍കിയിട്ടുണ്ട്.
കൊല്ലം രാമന്‍കുളങ്ങരയില്‍ ഒരു സ്വകാര്യ സ്ഥാപനത്തിലെ ജീവനക്കാരന്‍ അനന്തുവിനെയാണ് ശക്തികുളങ്ങര പോലീസ് അറസ്റ്റു ചെയ്തത്. ഇയാളുടെ സഹപ്രവര്‍ത്തകയാണ് അതിക്രമത്തിനിരയായത്. കേരള പ്രവാസി അസോസിയേഷന്‍ ജില്ലാ പ്രസിഡന്റ് ഹരിധരന്‍ യുവതിക്കുനേരെ അതിക്രമം നടത്തിയതിനെത്തുടര്‍ന്നാണ് അനന്തു ചോദ്യം ചെയ്തത്. എന്നാല്‍ ഇരുവരും തമ്മില്‍ വക്കേറ്റവും കയ്യാങ്കളിയുമുണ്ടായി. തൊട്ടടുത്ത ദിവസം യുവതി ശക്തികുളങ്ങര പോലീസില്‍ പീഡന പരാതി നല്‍കിയിരുന്നു. എന്നാല്‍, ആരോപണവിധേയനെ ആക്രമിച്ചെന്നു കാട്ടി ജാമ്യമില്ലാ വകുപ്പുകള്‍ ചേര്‍ത്ത് അനന്തുവിനെ അറസ്റ്റു ചെയ്യുകയായിരുന്നു. തുടര്‍ന്ന് ഒരു ദിവസം ഇയാള്‍ റിമാന്‍റില്‍ കഴിഞ്ഞു. യുവതിയുടെ പീഡന പരാതിയില്‍ ഒരു നടപടിയും പോലീസ് സ്വീകരിച്ചിരുന്നില്ല.
