ആലപ്പുഴ : അഞ്ചംഗ സംഘം പീഡിപ്പിച്ചെന്ന പ്ലസ്ടു വിദ്യാർഥിനിയുടെ പരാതി കെട്ടുകഥയെന്നു സൂചന. പെൺകുട്ടി ലൈംഗിക പീഡനത്തിന് ഇരയായിട്ടില്ലെന്നാണ് വൈദ്യപരിശോധനാ ഫലം. പ്രാഥമിക പരിശോധനയിൽ തന്നെ പരാതി കെട്ടിച്ചമച്ചതാണെന്ന് പോലീസിനു സംശയമുണ്ടായിരുന്നു.
തിങ്കളാഴ്ച ഉച്ചയ്ക്ക് ഒരു മണിയോടെ സ്കൂൾ വിട്ടുമടങ്ങവേ അഞ്ചംഗ സംഘം പീഡിപ്പിച്ചെന്നായിരുന്നു പെൺകുട്ടി രക്ഷാകർത്താക്കളോടു പറഞ്ഞത്. രക്ഷിതാക്കൾ രാമങ്കരി പോലീസിൽ പരാതിപ്പെട്ടു. പോലീസ് സംഭവസ്ഥലം പരിശോധിച്ച് സി.സി ടിവി ദൃശ്യം ശേഖരിക്കുകയും പ്രദേശവാസികളുടെ മൊഴി രേഖപ്പെടുത്തുകയും ചെയ്തു. ഇതൊന്നും കുട്ടിയുടെ മൊഴികളുമായി പൊരുത്തപ്പെട്ടില്ല. പെൺകുട്ടി നൽകിയ മൊഴികളിലും തുടക്കം മുതൽ വൈരുധ്യമുണ്ടായിരുന്നു. ഇങ്ങനെയൊരു പരാതി ഉയർത്താനുള്ള കാരണം വ്യക്തമായിട്ടില്ല. ഇതെക്കുറിച്ചും അന്വേഷിക്കുമെന്ന് പോലീസ് പറഞ്ഞു.
