കൊല്ലം: ടണലില് ഒളിച്ച അടിപിടി കേസിലെ പ്രതിയെ ഫയര് ഫോഴ്സിന്റെ സഹായത്താല് പിടികൂടി. കൊല്ലം ഉമയനല്ലൂരില് ആണ് സംഭവം. അടിപിടിക്കേസിലെ പ്രതിയെ പിടികൂടാനെത്തിയ പോലീസുകാരെയാണ് വയല് സ്വദേശി റഫീഖ് ആക്രമിച്ചത്. മാരകായുധങ്ങളുമായി നിന്ന പ്രതിയെ പിടികൂടാനുള്ള ശ്രമത്തില് ഇയാള് തടിക്കഷണം പോലീസുകാര്ക്ക് നേരെ എറിഞ്ഞു. ആക്രമണത്തില് കൊട്ടിയം സ്റ്റേഷനിലെ എഎസ്ഐ ബിജുവിന്റെ കാലിനു പരിക്കേറ്റു. ഇദ്ദേഹത്തെ കൊട്ടിയത്തെ ആശുപത്രിയില് പ്രവേശിപ്പിച്ചു.
ആക്രമണത്തിനുശേഷം കെഎപി കനാലിന്റെ ഭാഗമായുള്ള ടണലില് ഒളിച്ച റഫീഖിനെ ഫയര്ഫോഴ്സ് എത്തിയാണ് പിടികൂടിയത്. പ്രതി റഫീഖിനെ പിടികൂടാന് എഎസ്ഐ ബിജുവിന്റെ നേതൃത്വത്തില് എത്തിയ ഉമയനല്ലൂര് സ്റ്റേഷനിലെ പോലീസുകാര്ക്ക് നേരെയായിരുന്നു ആക്രമണം. മാരകായുധങ്ങള് കാണിച്ച് ഭീഷണിപ്പെടുത്തിയ പ്രതി പിന്നീട് പോലീസുകാര്ക്ക് നേരെ തടിക്കഷ്ണം എറിയുകയായിരുന്നു. തുടര്ന്ന് രക്ഷപ്പെടാന് വായുസഞ്ചാരമില്ലാത്ത കെഎപി കനാലിന്റെ ഭാഗമായുളള ടണലില് ഒളിക്കുകയായിരുന്നു.
പ്രതിയെ പിടികൂടാന് പോലീസ് ഫയര്ഫോഴ്സിന്റെ സഹായം തേടി. ഇവരുടെ സഹകരണത്തോടെ അരമണിക്കൂര് നീണ്ട പരിശ്രമത്തിന് ഒടുവിലാണ് പ്രതിയെ പിടികൂടിയത്. ടണലിന് അരക്കിലോമീറ്റര് ദൂരമുണ്ട്. ഓക്സിജന് മാസ്ക് ധരിച്ചാണ് ഫയര്ഫോഴ്സ് ഉദ്യോഗസ്ഥര് ടണലില് പ്രവേശിച്ചത്. പോലീസിന്റെ സമയോചിതമായ ഇടപെടലാണ് പ്രതിയെ ജീവനോടെ പിടികൂടാന് സഹായിച്ചത്.