തിരുവനന്തപുരം: സംസ്ഥാനം ചുട്ട്പൊള്ളുന്ന അവസ്ഥയില് അത്യുഗ്ര ചൂടിനെ നേരിടാന് മുന്നറിയപ്പുമായി ദുരന്ത നിവാരണ അതോറിറ്റി. ദിവസം കഴിയുന്തോറും വേനല്ച്ചൂട് അധികമായിക്കൊണ്ടിരിക്കുകയാണ്. ഈ സാഹചര്യത്തിലാണ് ദുരന്തനിവാരണ അതോറിറ്റി മുന്നറിയിപ്പുമായി എത്തിയിരിക്കുന്നത്.
കേന്ദ്ര കാലാവസ്ഥ വകുപ്പിന്റെ താപനില മാപിനികളില് ജനുവരി, ഫെബ്രുവരി മാസങ്ങളില് ഇതുവരെ രേഖപ്പെടുത്തപ്പെട്ട ഉയര്ന്ന താപനില സര്വകാല റെക്കോര്ഡ് ഭേദിക്കുന്നതാണെന്ന് അതോറിറ്റി വ്യക്തമാക്കുന്നു. ഉയര്ന്ന ദിനാന്തരീക്ഷ താപനില വിവിധയിടങ്ങളില് 37 ഡിഗ്രി സെല്ഷ്യസിലും ഉയരുന്ന സാഹചര്യമാണുള്ളത്. കടലോര സംസ്ഥാനമായതിനാല് ഉയര്ന്ന അന്തരീക്ഷ ആര്ദ്രതയും താപസൂചിക ഉയര്ത്തുന്ന ഘടകങ്ങളാണ്. അതിനാല് ചൂടുമൂലമുള്ള ആരോഗ്യപ്രശ്നങ്ങളെ നേരിടുന്നതിന് പൊതുജനം ജാഗ്രത പുലര്ത്തണമെന്നും ആരോഗ്യ വകുപ്പ് അധികൃതര് അറിയിച്ചു.
