ഇടുക്കി: ജില്ലയിലെ പോലീസ് കാന്‍റീനുകളില്‍ വിജിലന്‍സ് മിന്നല്‍ പരിശോധന നടത്തി. അടിമാലി, മൂന്നാര്‍, കട്ടപ്പന, തൊടുപുഴ, പീരുമേട്, നെടുങ്കണ്ടം എന്നിവിടങ്ങളില്‍ പോലീസ് സ്റ്റേഷനുകളോട് അനുബന്ധിച്ചു പ്രവര്‍ത്തിക്കുന്ന ജനമൈത്രി കാന്‍റീനുകളില്‍ പരിശോധന നടത്തിയത്. തൊടുപുഴ വിജിലന്‍സ് വിഭാഗത്തിന്റെ നേതൃത്വത്തിലായിരുന്നു പരിശോധന.
ജില്ലയിലെ പോലീസ് കാന്‍റീനുകളുടെ പ്രവര്‍ത്തനം ഒന്നര മാസം മുന്‍പ് ജില്ല പൊലീസ് മേധാവി വിലക്കിയിരുന്നു. തുടര്‍ന്ന് വിഷയത്തില്‍ സംസ്ഥാന പോലീസ് മേധാവി ബന്ധപ്പെടുകയും കഴിഞ്ഞ മാസം അവസാനത്തോടെ കാന്‍റീന്‍ പ്രവര്‍ത്തനം അവസാനിപ്പിക്കണം എന്ന് നിര്‍ദേശം നല്‍കിയിരുന്നു.
ഇത്തരം സാഹചര്യം നില നില്‍ക്കുമ്പോളാണ് കാന്‍റീനുകളുടെ പ്രവര്‍ത്തനം സംബന്ധിച്ചും വരവ് ചെലവ് കണക്ക് സംബന്ധിച്ചും പ്രവര്‍ത്തന മൂലധനം സംബന്ധിച്ചും പരിശോധന ആരംഭിച്ചത്.
