പത്തനംതിട്ട : നവകേരളാ സദസ്സിന്റെ പേരിൽ ധൂർത്ത് നടത്തുന്ന പിണറായി സർക്കാരിെന്റ നടപടിക്കെതിരെ സമാധാനപരമായി കരിങ്കൊടി പ്രതിഷേധം നടത്തിയ വനിതകൾ ഉൾപ്പെടെയുള്ള കെ.എസ്.യു. യൂത്ത് കോൺഗ്രസ് പ്രവർത്തകരെ ക്രൂരമായി തല്ലിച്ചതക്കുകയും നേതാക്കളുടെ വീട് ആക്രമിക്കുകയും ചെയ്ത സംഭവത്തതിൽ പ്രതിഷേധിച്ച് കെ.പി.സി.സി ആഹ്വാനം അനുസരിച്ച് ബുധനാഴ്ച്ച (20) മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ജില്ലയിലെ എല്ലാ പോലീസ് സ്റ്റേഷനുകളിലേക്കും പ്രതിഷേധ മാർച്ച് സംഘടിപ്പിക്കും. ജില്ലാ തല ഉദ്ഘാടനം പത്തനംതിട്ടയിൽ ഡി.സി.സി പ്രസിഡന്റ് പ്രൊഫ സതീഷ് കൊച്ചുപറമ്പിൽ നിർവഹിക്കുമെന്ന് ജനറൽ സെക്രട്ടറി സാമുവൽ കിഴക്കു പുറം പറഞ്ഞു.
വിവിധ പോലീസ് സ്റ്റേഷനുകളിലേക്ക് നടക്കുന്ന മാർച്ചുകൾ കെ.പി.സി.സി ജനറൽ സെക്രട്ടറി അഡ്വ. പഴകുളം മധു (അടൂർ ) നേതാക്കളായ അഡ്വ. കെ. ശിവദാസൻനായർ (ആറന്മുള ) പി.മോഹൻരാജ് (കോയിപ്രം) പന്തളം സുധാകരൻ (ഏനാത്ത് ) ജോർജ്ജ് മാമ്മൻ കൊണ്ടൂർ (പുളിക്കീഴ് ) മാലേത്ത് സരളാദേവി (പന്തളം) അനീഷ് വരിക്കണ്ണാമല (തിരുവല്ല) കെ.ജയവർമ്മ (പെരുംപട്ടി) റെജി തോമസ് (കീഴ് വായ്പൂർ ) എ.സുരേഷ് കുമാർ (ഇലവുംതിട്ട) ടി.കെ സാജു (വെച്ചൂച്ചിറ ) റിങ്കു ചെറിയാൻ(റാന്നി ) എ.ഷംസുദീൻ (കോന്നി ) എൻ. ഷൈലാജ് (കൂടൽ) മാത്യു കുളത്തുങ്കൽ (തണ്ണിത്തോട്) റോബിൻ പീറ്റർ (ആങ്ങമൂഴി ) വെട്ടൂർ ജ്യോതിപ്രസാദ് (ചിറ്റാർ ) സാമുവൽ കിഴക്കുപുറം (മലയാലപ്പുഴ) എന്നിവർ ഉത്ഘാടനം ചെയ്യും.
നവകേരള സദസ്സിനായി മുഖ്യമന്ത്രി പത്തനംതിട്ട ജില്ലയിൽ എത്തിച്ചേർന്ന കഴിഞ്ഞ ദിവസം റാന്നി, മൈലപ്രാ, കോന്നി എന്നിവിടങ്ങളിൽ സമാധാനപരമായി പ്രതിഷേധിച്ച യൂത്ത് കോൺഗ്രസ് പ്രവർത്തകരെ പോലീസും ഡി.വൈ.എഫ്.ഐ ക്രിമിനലുകളും മർദ്ദിച്ച സംഭവത്തെക്കുറിച്ചും ശബരിമല ഹെൽപ്പ് ഡെസ്ക്കിൽ തീർത്ഥാടകർക്ക് സേവനം നടത്തിക്കൊണ്ടിരുന്ന പ്രവർത്തകരെ കാരണം കൂടാതെ കരുതൽ അറസ്റ്റ് നടത്തി രാത്രി വരെ പോലീസ് സ്റ്റേഷനിൽ ഇരുത്തിയ മനുഷ്യാവകാശ ലംഘനത്തെ ക്കുറിച്ചും അന്വേഷണം നടത്തി കുറ്റക്കാരെ കണ്ടെത്തി നടപടി സ്വീകരിക്കണമെന്ന് ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിൽ ആവശ്യപ്പെട്ടു. പിണറായി പോലീസിന്റെ എല്ലാ പ്രതിബന്ധങ്ങളേയും സി.പി.എം ഗുണ്ടകളുടെ ഭീഷണികളേയും അതിജീവിച്ച് നവകേരള ധൂർത്തിനെതിരെ ജില്ലയിൽ ശക്തമായ പ്രതിഷേധം സംഘടിപ്പിച്ച യൂത്ത് കോൺഗ്രസ്, കെ.എസ്.യു നേതാക്കളേയും പ്രവർത്തകരേയും ഡി.സി.സി പ്രസിഡന്റ് അഭിനന്ദിച്ചു.
