തിരുവനന്തപുരം : ബലിയിടാന്‍ പോയ വിദ്യാര്‍ഥിക്ക് 2000 രൂപ പിഴയിട്ട് 500 രൂപയുടെ രസീത് നല്‍കിയ പോലീസുകാരന് സസ്പെന്‍ഷന്‍. തിരുവനന്തപുരം ശ്രീകാര്യത്താണ് സംഭവം. പിഴയീടാക്കിയ ശ്രീകാര്യം പോലീസ് സ്റ്റേഷന്‍ സി.പി.ഒ അരുണ്‍ ശശിയെ അന്വേഷണ വിധേമായി സര്‍വീസില്‍ നിന്ന് സസ്പെന്ഡ് ചെയ്തു. സ്റ്റേഷനിലെ സി.ഐക്കെതിരെ അന്വേഷണത്തിനും സിറ്റി പോലീസ് കമ്മീഷണര്‍ ഉത്തരവിട്ടു.
ബലിതര്‍പ്പണത്തിനായി അമ്മയ്‌ക്കൊപ്പം വീടിന് സമീപമുള്ള ക്ഷേത്രത്തിലേക്ക് പോയ ശ്രീകാര്യം വെഞ്ചാവോട് ശബരി നഗറിലെ നവീനാണ് പോലീസ് 2000 രൂപ പിഴയിട്ട് 500 രൂപയുടെ രസീത് നല്‍കിയത്. സ്റ്റേഷനിലെത്തിച്ച്‌ പിഴ ഈടാക്കിയ ശേഷമാണ് ഇവരെ വിട്ടയച്ചത്. സംഭവം നവീന്‍ ഫെയ്സ്ബുക്കില്‍ പോസ്റ്റ് ചെയ്തതോടെയാണ് വിവാദമായത്. ഇതേതുടര്‍ന്നാണ് നടപടി. അതേസമയം രസീത് എഴുതിയതിലെ പിഴവാണ് 2000 അഞ്ഞൂറായതെന്നാണ് പോലീസ് നല്‍കിയിരുന്ന വിശദീകരണം.
