പത്തനംതിട്ട : പിണറായി സർക്കാരിന്റെ ധൂർത്തിനും അതിക്രമങ്ങൾക്കുമെതിരെ തിരുവനന്തപുരത്ത് ഡി.ജി.പി ഓഫീസിലേക്ക് കോൺഗ്രസ് നേതൃത്വത്തിൽ നടത്തിയ മാർച്ചിന് നേരേ പോലീസ് നടത്തിയ നരനായാട്ടിൽ പ്രതിഷേധിച്ച് ഇന്ന് (23 ശനിയാഴ്ച്ച) വൈകിട്ട് 5-മണിക്ക് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ പ്രകടനവും യോഗവും സംഘടിപ്പിക്കും. പ്രസിഡന്റ് പ്രൊഫ.സതീഷ് കൊച്ചുപറമ്പിലിന്റെ നേതൃത്വത്തിൽ പത്തനംതിട്ട അബാൻ ജംഗ്ഷനിൽ നിന്നും ആരംഭിക്കുന്ന പ്രകടനം ഗാന്ധി സ്ക്വയറിൽ സമാപിക്കും. തുടന്ന് പ്രതിഷേധ യോഗം നടക്കും. പ്രതിഷേധ പ്രകടനത്തിലും യോഗത്തിലും പങ്കെടുക്കുവാൻ കോൺഗ്രസിന്റേയും പോഷക സംഘടനകളുടേയും എല്ലാ തലങ്ങളിലുമുള്ള നേതാക്കളും ഭാരവാഹികളും പ്രവർത്തകരും വൈകിട്ട് 5-മണിക്ക് മുമ്പായി അബാൻ ജംഗ്ഷനിൽ എത്തിച്ചേരണമെന്ന് ഡി.സി.സി ജനറൽ സെക്രട്ടറി സാമുവൽ കിഴക്കുപുറം അഭ്യർത്ഥിച്ചു.
സർക്കാരിന്റെ ധൂർത്തിനും പോലീസ്, സി.പി.എം അഴിഞ്ഞാട്ടത്തിനുമെതിരെ പോലീസ് ആസ്ഥാനത്തേക്ക സമാധാനപരമായി മാർച്ച് നടത്തിയ കെ.പി സി സി പ്രസിഡന്റ്, പ്രതിപക്ഷ നേതാവ് എന്നിവർ അടക്കമുള്ള കോൺഗ്രസ് നേതാക്കൾക്കെതിരെ പിണറായി പോലീസ് നടത്തിയ ക്രൂരമായ ലാത്തിച്ചാർജ്ജിനേയും കണ്ണീർ വാതക പ്രയോഗത്തേയും ഡി. സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിൽ ശക്തമായി അപലപിച്ചു. സർക്കാരിനെതിരായ കോൺഗ്രസിന്റേയും യു.ഡി.എഫിന്റേയും പ്രതിഷേധ സമരങ്ങളെ ചോരയിൽ മുക്കി അടിച്ചമർത്തുവാനുള്ള മുഖ്യമന്ത്രിയുടെ നീക്കങ്ങളെ എന്ത് വില കൊടുത്തും ശക്തമായി പ്രതിരോധിക്കുമെന്ന് പ്രൊഫ.സതീഷ് കൊച്ചുപറമ്പിൽ മുന്നറിയിപ്പ് നല്കി.
