ദില്ലി: കൊട്ടാരക്കര താലൂക്ക് ആശുപത്രിയിലെ വനിതാ ഡോക്ടറുടെ കൊലപാതകത്തില് പോലീസ് വീഴ്ച അന്വേഷിക്കണമെന്ന് ഇന്ത്യന് മെഡിക്കല് അസോസിയേഷന്(ഐഎംഎ) ദേശീയ പ്രസിഡന്റ് ഡോ ശരത് കുമാര് അഗര്വാള്. വന്ദനയുടെ മരണം ഞെട്ടിക്കുന്നതാണ്. സുരക്ഷ നല്കാന് പോലും തയ്യാറാകാത്ത ഉദ്യോഗസ്ഥനെ പിരിച്ചു വിടണം. ആരോഗ്യ പ്രവര്ത്തകര്ക്ക് എതിരായ അതിക്രമം തടയാന് കേന്ദ്ര നിയമം മാത്രമാണ് പരിഹാരം. ഇനിയെങ്കിലും സര്ക്കാര് നടപടികള് പൂര്ത്തിയാക്കി നിയമം പാസാക്കണമെന്നും ഡോ ശരത് കുമാര് അഗര്വാള് പറഞ്ഞു.
ഇന്ന് പുലര്ച്ചെ നാല് മണിയോടെയാണ് സംഭവം നടന്നത്. കോട്ടയം സ്വദേശിനിയായ ഡോക്ടര് വന്ദന ദാസാണ് കൊല്ലപ്പെട്ടത്. വൈദ്യപരിശോധനയ്ക്കെത്തിയ കൊല്ലം സ്വദേശി സന്ദീപാണ് ഡോക്ടറെ ആക്രമിച്ചത്. ലഹരിക്കടിമയായ പ്രതി യാതൊരു പ്രകോപനവുമില്ലാതെ ഡോക്ടറെ ആക്രമിക്കുകയായിരുന്നു.പ്രതി അക്രമാസക്തനാകുന്നതുകണ്ട് ഭയന്ന ഡോക്ടര് ഓടി രക്ഷപ്പെടാന് ശ്രമിച്ചെങ്കിലും ഇയാള് ചവിട്ടി വീഴ്ത്തുകയായിരുന്നു. തുടര്ന്ന് ഡോക്ടറുടെ കഴുത്തിലും നെഞ്ചിലും പിന്ഭാഗത്തുമായി കുത്തി. ഗുരുതരമായി പരുക്കേറ്റ വന്ദനയെ തിരുവനന്തപുരം കിംസ് ആശുപത്രിയില് എത്തിച്ചെങ്കിലും എട്ടരയോടെ മരണം സംഭവിക്കുകയായിരുന്നു.
