കോഴിക്കോട് : ഫാറൂഖ് സ്റ്റേഷനിലെ സീനിയര് സിവില് പോലീസ് ഓഫീസര് യു ഉമേഷിനെ പോലീസ് സേനയില് നിന്ന് പിരിച്ചു വിടാന് തീരുമാനം. നിര്ബന്ധിത വിരമിക്കല് ഉത്തരവില് ഐ ജി എ വി ജോര്ജ് വിരമിക്കുന്നതിന് മുമ്പ് ഒപ്പ് വെച്ചു. പോലീസ് സേനയ്ക്കെതിരെ സമൂഹ മാധ്യമങ്ങളിലൂടെ നിരന്തരം വിമര്ശനം ഉന്നയിക്കുന്ന സാഹചര്യത്തിലാണ് തീരുമാനമെന്നാണ് വിവരം.
ഉമേഷിന്റെ അച്ചടക്ക ലംഘനം അംഗീകരിക്കാനാവില്ലെന്ന് വിരമിച്ചതിന് പിന്നാലെ മാധ്യമങ്ങള്ക്ക് നല്കിയ അഭിമുഖത്തില് എ വി ജോര്ജ് വ്യക്തമാക്കിയിരുന്നു. അനിവാര്യമായ നടപടിയാണിതെന്ന് എ വി ജോര്ജ് മാധ്യമങ്ങളോട് പറഞ്ഞു. പോലീസ് സേനയ്ക്കെതിരെ സമൂഹ മാധ്യമങ്ങളിലൂടെ ഉമേഷ് വള്ളിക്കുന്ന് നിരന്തരം വിമര്ശനം ഉന്നയിച്ചിരുന്നു.
