മധുര : ഇടുക്കി ജില്ലയ്ക്ക് പ്രതീക്ഷയേകുന്ന മധുര – ബോഡിനായ്ക്കന്നൂര് റെയില്പാതയില് ആണ്ടിപ്പെട്ടി മുതല് തേനി വരെയുള്ള 17 കിലോ മീറ്റര് ഭാഗത്തു ട്രെയിനിന്റെ അതിവേഗ പരീക്ഷണ ഓട്ടം വിജയകരമായി പൂര്ത്തിയായി. ഇതിനു മുന്നോടിയായി മധ്യ റെയില്വേ സുരക്ഷാ കമ്മീഷണര് മനോജ് അറോറയുടെ നേതൃത്വത്തിലുള്ള സംഘം പാളത്തില് പരിശോധന നടത്തിയിരുന്നു.
120 കിലോമീറ്റര് വേഗത്തില് 4 ബോഗികള് ഘടിപ്പിച്ച ട്രെയിന് കടന്നുപോയപ്പോള് നാട്ടുകാര് ആവേശത്തോടെയാണു വരവേറ്റത്. മധുരയില് നിന്നു തേനി വരെ ഇനി ട്രെയിന് സര്വീസ് തുടങ്ങാന് കഴിയും. തേനിയില് നിന്നു ബോഡിനായ്ക്കന്നൂര് വരെയുള്ള 17 കിലോമീറ്റര് പാതയുടെ നിര്മ്മാണം പൂര്ത്തിയാകാനുണ്ട്.
മധുരയില് നിന്നു ബോഡിനായ്ക്കന്നൂര് വരെ 91 കിലോമീറ്റര് ആണുള്ളത്. ഇതില് മധുര മുതല് ആണ്ടിപ്പെട്ടി വരെയുള്ള 57 കിലോമീറ്റര് ഭാഗത്തെ ജോലികള് പൂര്ത്തിയാക്കി നേരത്തേ പരീക്ഷണ ഓട്ടം നടത്തിയിരുന്നു. ആണ്ടിപ്പെട്ടി മുതല് തേനി വരെയുള്ള 17 കിലോമീറ്റര് ഭാഗത്തെ പരീക്ഷണ ഓട്ടമാണു രണ്ടാംഘട്ടമായി ഇപ്പോള് പൂര്ത്തിയാക്കിയത്.
