തൃശൂര് : ഒറ്റരാത്രിയില് മൂന്നു ജില്ലകളിലായി പോലീസ് നടത്തിയ തിരച്ചിലില് പിടിയിലായത് 545 പിടികിട്ടാപ്പുള്ളി കളും വാറന്റ് പ്രതികളും. സാമൂഹിക വിരുദ്ധരെ പിടികൂടുന്നതിന്റെ ഭാഗമായി തൃശൂര് റേഞ്ചിനു കീഴിലെ പാലക്കാട്, മലപ്പുറം, തൃശൂര് ജില്ലകളില് പോലീസ് നടത്തിയ തിരച്ചിലില് ആണ് ഇത്രയധികം പേര് കുടുങ്ങിയത്. 128 അബ്കാരി കേസുകള് രജിസ്റ്റര് ചെയ്തു. 32 ലഹരിമരുന്നു കേസുകളും രജിസ്റ്റര് ചെയ്തു. അന്വേഷണത്തിലിരുന്ന 107 കേസുകളിലെ പ്രതികളെ പിടികൂടാനായി. ഡിഐജി എ.അക്ബറിന്റെ നേതൃത്വത്തില് ആയിരുന്നു പരിശോധന. 11,031 വാഹനങ്ങള് പരിശോധിച്ചു. ലോഡ്ജുകള്, ബസ് സ്റ്റാന്ഡുകള്, റെയില്വേ സ്റ്റേഷന് എന്നിങ്ങനെ 381 കേന്ദ്രങ്ങളില് റെയ്ഡ് നടത്തി. 416 പട്രോളിങ് ടീമുകള് പരിശോധനയില് പങ്കെടുത്തു.
