കോഴിക്കോട് : ബിജെപി പ്രവര്‍ത്തകനെ വധിക്കാന്‍ ശ്രമിച്ച സംഭവത്തില്‍ പോപ്പുലര്‍ ഫ്രണ്ട് പ്രവര്‍ത്തകന്‍ അറസ്റ്റില്‍. കുറ്റിക്കാട്ടൂര്‍ സ്വദേശി അന്‍സാര്‍ ആണ് അറസ്റ്റിലായത്. 2019 ല്‍ രജിസ്റ്റര്‍ ചെയ്ത കേസിലാണ് അറസ്റ്റ്. ബിജെപി പ്രവര്‍ത്തകന്‍ ഷാജിയെയാണ് അന്‍സാറിന്റെ നേതൃത്വത്തിലുള്ള സംഘം വെട്ടിക്കൊലപ്പെടുത്താന്‍ ശ്രമിച്ചത്. 2019 ഒക്ടോബറിലായിരുന്നു സംഭവം. രാത്രി ഷാജിയുടെ ഓട്ടോയില്‍ യാത്രക്കാരെന്ന വ്യാജേന കയറിയ സംഘം വിജനമായ പ്രദേശത്തുവെച്ച്‌ ആക്രമിക്കുകയായിരുന്നു.
സംഭവത്തില്‍ ഷാജിയ്‌ക്ക് ഗുരുതരമായി പരിക്കേറ്റിരുന്നു. മാസങ്ങള്‍ നീണ്ട ചികിത്സയ്‌ക്ക് ശേഷമാണ് ഷാജി ആരോഗ്യസ്ഥിതി വീണ്ടെടുത്തത്. അക്രമി സംഘത്തിലെ പ്രധാനിയാണ് അന്‍സാര്‍. സംഭവ ശേഷം ഒളിവില്‍ പോയ ഇയാള്‍ക്കായി ഊര്‍ജ്ജിത അന്വേഷണമാണ് പോലീസ് നടത്തിയിരുന്നത്.
സംഭവത്തില്‍ കഴിഞ്ഞ വര്‍ഷം രണ്ട് പോപ്പുലര്‍ ഫ്രണ്ട് പ്രവര്‍ത്തകരെ പോലീസ് അറസ്റ്റ് ചെയ്തിരുന്നു. ചേവായൂര്‍ പോലീസ് ആണ് അന്‍സാറിനെ അറസ്റ്റ് ചെയ്തത്. പോപ്പുലര്‍ ഫ്രണ്ടിന്റെ ആയുധ പരിശീലന സംഘത്തിലെ പ്രധാനിയാണ് അറസ്റ്റിലായ അന്‍സാര്‍.
