കോന്നി : തക്കാളി വണ്ടിയില് പച്ചക്കറി സാധനങ്ങള്ക്ക് ആവശ്യക്കാരേറെ. സംസ്ഥാന കൃഷിവകുപ്പ്, ഹോര്ട്ടികോര്പ്പ്, വെജിറ്റബിള് ആന്റ് ഫ്രുട്ട്സ് പ്രമോഷന് കൗണ്സില് എന്നിവയുടെ നേതൃത്വത്തിലാണ് ജില്ലയിലെ കോന്നി , റാന്നി താലൂക്കുകളില് തക്കാളിവണ്ടി വ്യാപാര പര്യടനം നടത്തുന്നത്. പൊതു വിപണിയെക്കാള് കുറഞ്ഞ വിലയ്ക്കാണ് തക്കാളി വണ്ടിയിലൂടെ പൊതുജനങ്ങള്ക്കായി തക്കാളി, സാവാള, കിഴങ്ങ്, ചേന, ചേമ്പ് ഉള്പ്പെടെയുള്ള പച്ചക്കറി സാധനങ്ങള് ലഭിക്കുന്നത്.
പൊതു വിപണിയില് എഴുപത് രൂപയോളം വിലയുള്ള തക്കാളി 48രൂപയ്ക്കും അന്പത് രൂപ വിലയുള്ള സാവാള നാല്പ്പത് രൂപയ്ക്കും നാല്പ്പത് രൂപ വിലയുള്ള ഉരുളക്കിഴങ്ങ് 32 രൂപയ്ക്കുമാണ് തക്കാളി വണ്ടിയിലൂടെ വിതരണം ചെയ്യുന്നത്. അതുകൊണ്ട് തക്കാളി വണ്ടി വഴി ലഭിക്കുന്ന പച്ചക്കറിക്ക് ആവശ്യക്കാരേറെയാണ്. ഡിസംബര് 17 മുതലാണ് കോന്നി,റാന്നി താലൂക്കുകളിലായി തക്കാളി വണ്ടി പര്യടനം തുടങ്ങിയത്. ഒരു ദിവസവും പതിനയ്യായിരം മുതല് ഇരുപതിനായിരം രൂപ വരെ തക്കാളി വണ്ടിയില് വിറ്റുവരവുണ്ട്.
