കവിയൂർ : അങ്കണവാടി കെട്ടിടത്തോട് ചേർന്നുകിടക്കുന്ന വൈദ്യുതലൈൻ അപകടക്കെണി തീർക്കുന്നു. കോട്ടൂർ പുന്നിലം മൂന്നാം വാർഡിൽ അഞ്ചാം നമ്പർ അങ്കണവാടികെട്ടിടത്തിന്റെ ഷെയ്ഡിനോട് ചേർന്നാണിത് കടന്നുപോകുന്നത്. 2019-20 പദ്ധതിയിൽ 10 ലക്ഷംരൂപ മുടക്കി പണിത കെട്ടിടമാണ്. പുന്നിലം തകിടിനഗറിൽ ഇതിനായി കെട്ടിടം പണിയുമ്പോൾ കെഎസ്ഇബി അതുവഴി ലൈൻ വലിച്ചിരുന്നില്ല. ഇതിന്റെ പ്രവർത്തനം തുടങ്ങി നാളുകൾ കഴിഞ്ഞാണ് വൈദ്യുത കണകഷനുകൾ നൽകാൻവേണ്ടി ലൈൻ വലിച്ചത്.
അടുത്ത പുരയിടത്തിലെ പുളിമരം അടക്കം വൈദ്യുതകമ്പികളിൽ മുട്ടിയാണ് കിടക്കുന്നത്.
അങ്കണവാടിയുടെ തൊട്ടുമുന്നിലാണ് എംപി ഫണ്ടിൽ തീർത്ത മിനിമാസ്റ്റ് വിളക്കും സ്ഥാപിച്ചിട്ടുള്ളത്. നാലുമാസം മുൻപാണ് ഇത് വെച്ചത്. വൈദ്യുതലൈനിൽനിന്നുള്ള അപകടങ്ങളാൽ ജീവനുകൾ പൊലിയുന്ന സംഭവങ്ങൾ ഏറുകയാണ്. അതിനാൽ ഇക്കാര്യം കാട്ടിയുള്ള പരാതി പഞ്ചായത്തിന് നൽകിയതായി അങ്കണവാടി ജീവനക്കാർ പറഞ്ഞു.
