റാന്നി : മണിമല – റാന്നി 33 കെവി വൈദ്യുതി ലൈന് കടന്നു പോകുന്ന തൂണ് ചരിഞ്ഞു സമീപത്തെ കെട്ടിടത്തിനു മുകളിലേയ്ക്കു വീണു. ഇന്നു കാലത്ത് 6 മണിയോടെ ചെത്തോങ്കരയിലാണ് സംഭവം. വന് ദുരന്തം ഒഴിവായത് തലനാരിഴയ്ക്ക്. പുനലൂര് – മൂവാറ്റുപുഴ സംസ്ഥാന പാതയുടെ നിര്മ്മാണവുമായി ബന്ധപ്പെട്ട് വീതി കൂട്ടി നിര്മ്മിക്കുവാന് കുഴിയെടുത്തിടത്താണ് സംഭവം. ഒരാഴ്ച മുന്പാണ് പഴയ പാലം പൊളിച്ചത്. പുതിയ പാലത്തിന്റെ നിര്മ്മാണത്തിനായി മണ്ണുമാന്തി യന്ത്രമുപയോഗിച്ച് സമീപത്ത് എടുത്ത കുഴി ഇടിഞ്ഞുതാണതോടെയാണ് വൈദ്യുതി തൂണ് മറിഞ്ഞുവീണത്.
അപകടം ഉണ്ടായാല് ഉടന് ഓഫാകുന്ന തരത്തിലുള്ള സജ്ജീകരണമുണ്ടായിരുന്നതാണ് അപകടം ഒഴിവാകാന് കാരണമെന്ന് അധികൃതര് സൂചിപ്പിച്ചു. ടൗണില് വൈദ്യുതി മുടങ്ങാതിരിക്കാനായി മന്ദിരം സബ് സ്റ്റേഷനിലേയ്ക്ക് മണിമലയില് നിന്നും വൈദ്യുതി എത്തിക്കുന്ന ലൈനാണിത്. തൂണ് പുനസ്ഥാപിച്ച് വൈദ്യുതി തടസ്സം ഒഴിവാക്കാനുള്ള ശ്രമം കെ.എസ്.ഇ.ബി ആരംഭിച്ചു.
