കോഴിക്കോട്: സംഘ്പരിവാര് അജണ്ടകളുമായി മുന്നോട്ടുപോകുന്ന ലക്ഷദ്വീപിലെ പുതിയ അഡ്മിനിസ്ട്രേറ്റര് പ്രഫുല് കെ പട്ടേലിന്റെ ഫേസ്ബുക്ക് പേജില് മലയാളികളുടെ പൊങ്കാല. മലയാളത്തിലും ഇംഗ്ലീഷിലുമാണ് കൂടുതല് പേരും കമന്റ് ചെയ്യുന്നത്.
മലയാളം എഴുതാനും വായിക്കാനും താമസിയാതെ താങ്കള് പഠിക്കും, പഠിപ്പിക്കും എന്നാണ് ഒരു കമന്റ്. #Savelakshadweep, #prafulpatelgoback #standwithlakshdweep എന്നീ കമന്റുകളും പ്രഫുല് പട്ടേലിന്റെ ഫേസ്ബുക്ക് പോസ്റ്റിന് താഴെ നിറയുകയാണ്. ലക്ഷദ്വീപിനെ ദുരന്ത ദ്വീപാക്കാനുള്ള സംഘ് പരിവാര് അജണ്ട അനുവദിച്ചു കൊടുക്കരുത്, പട്ടേല് രാജിവെച്ച് പോകുക എന്നൊക്കെയാണ് കമന്റ്കള്.
ബീഫ് നിരോധനം മുതല് കുടിയൊഴിപ്പിക്കല് വരെയുള്ള സംഘ്പരിവാര് അജണ്ടകളുമായാണ് അഡ്മിനിസ്ട്രേറ്റര് മുന്നോട്ടുപോകുന്നത്. പ്രധാനമന്ത്രി നരേന്ദ്രമോദിയുടെ വിശ്വസ്തനും മുന് ഗുജറാത്ത് ആഭ്യന്തരമന്ത്രിയുമായിരുന്നു പ്രഫുല് കെ പട്ടേല്. ചുമതലയേറ്റ ശേഷം അദ്ദേഹം വിദ്യാഭ്യാസ സ്ഥാപനങ്ങളിലെ ഭക്ഷ്യ മെനുവില്നിന്ന് മാംസാഹാരം എടുത്തുമാറ്റുകയും ഗോവധ നിരോധന നിയമം കൊണ്ടുവരുന്നതിനുള്ള നടപടികള് ആരംഭിക്കുകയും ചെയ്തു. കുറ്റകൃത്യങ്ങള് കുറഞ്ഞ സ്ഥലമെന്ന നിലയില് ലോകശ്രദ്ധയാകര്ഷിച്ച ലക്ഷദ്വീപില് ഗുണ്ട ആക്ട് ഏര്പ്പെടുത്തുകയും ചെയ്തു. മദ്യനിരോധിത മേഖലയായ ദ്വീപില് ബാര് ലൈസന്സ് അനുവദിച്ചിട്ടുമുണ്ട്. ഈ നടപടികള്ക്കെതിരെ സമൂഹിക-സാംസ്കാരിക-രാഷ്ട്രീയ മേഖലയിലുള്ളവര് പ്രതിഷേധവുമായി രംഗത്തെത്തിയിട്ടുണ്ട്.
