ന്യൂഡല്ഹി: കേരളത്തിലെ നിയമസഭ തെരഞ്ഞെടുപ്പില് ബി.ജെ.പിയുടെ സ്ഥാനാര്ത്ഥി പ്രഖ്യാപനത്തെ ട്രോളി മുതിര്ന്ന അഭിഭാഷകന് പ്രശാന്ത് ഭൂഷണ്. കാര്ട്ടൂണ് പങ്കുവെച്ചാണ് പ്രശാന്ത് ഭൂഷന്റെ ട്വീറ്റ്.
‘തൊഴില് രഹിതരായ യുവജനങ്ങള്ക്കിപ്പോള് മുന്നോട്ടുവന്ന് ജോലി ആവശ്യപ്പെടാന് ഭയമാണ്. തൊഴിലിന് പകരം കേരളത്തില് മത്സരിക്കാന് ബി.ജെ.പി ടിക്കറ്റാകും നല്കുക’ -പ്രശാന്ത് ഭൂഷണ് ട്വിറ്ററില് കുറിച്ചു.
എം.ബി.എ ഡിഗ്രി കൈയില് പിടിച്ച് ജോലി ആവശ്യപ്പെടുന്ന ചെറുപ്പക്കാരന് തെരഞ്ഞെടുപ്പ് ടിക്കറ്റ് കൈയിലേക്ക് നല്കുന്ന കാര്ട്ടുണാണ് പ്രശാന്ത് ഭൂഷണ് പങ്കുവെച്ചത്. രാജ്യത്തെ മറ്റു സംസ്ഥാനങ്ങളില് ബി.ജെ.പി ശക്തിയാര്ജിക്കുന്നതും കേരളത്തില് ബി.ജെ.പി ടിക്കറ്റില് മത്സരിക്കാന് പോലും ആളെകിട്ടാത്തതും സമൂഹമാധ്യമങ്ങളിലടക്കം വന് ചര്ച്ചയായിരുന്നു.
മാനന്തവാടിയില് ബി.ജെ.പി സ്ഥാനാര്ത്ഥിയായി പ്രഖ്യാപിച്ച മണികണ്ഠന് പിന്മാറിയ വാര്ത്ത വലിയ ചര്ച്ചയായിരുന്നു. താന് അറിയാതെയായിരുന്നു ബി.ജെ.പിയുടെ പ്രഖ്യാപനമെന്നും ബി.ജെ.പി അനുഭാവിയല്ലെന്നും അതിനാല് ബി.ജെ.പിയുടെ തീരുമാനം സന്തോഷത്തോടെ നിരസിക്കുന്നുവെന്നും മണികണ്ഠന് വ്യക്തമാക്കിയിരുന്നു.
