പത്തനംതിട്ട: പിണറായി സർക്കാർ പ്രവാസികൾക്ക് നിരവധി വാഗ്ദാനങ്ങൾ നൽകി വഞ്ചിച്ചതായി ഡി.ഡി.സി പ്രസിഡന്റ് ബാബു ജോർജ് പറഞ്ഞു. സർക്കാരിന്റെ വാഗ്ദാന ലംഘനങ്ങൾക്കെതിരെ കേരള പ്രദേശ് പ്രവാസി കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ കളക്ടറേറ്റിന് മുമ്പിൽ നടത്തിയ പ്രതിഷേധ സത്യാഗ്രഹം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സമസ്ത മേഖലകളിലും പരാജയപ്പെട്ട സർക്കാരാണ് കേരളത്തിൽ ഭരണം നടത്തുന്നത്. അഴിമതിക്കാർ, സ്വർണകടത്തുകാർ, ലഹരി മാഫിയകൾ എന്നിവവരാണ് സർക്കാരിനെ നിയന്ത്രിക്കുന്നത്. മുഖ്യമന്ത്രി അഴിമതിക്കാരുടെ തടവറയിലാണെന്നും ബാബു ജോർജ് പറഞ്ഞു. കോവിഡ് സാഹചര്യം മൂലം മടങ്ങിവന്ന പ്രവാസികളുടെ ദുരിതം പരിഹരിക്കുവാനും മരിച്ച പ്രവാസികളുടെ ആശ്രിതർക്ക് മതിയായ ധനസഹായം ലഭ്യമാക്കുവാനും സർക്കാർ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
പ്രവാസി കോൺഗ്രസ് ജില്ലാ വൈസ് പ്രസിഡന്റ് അബ്ദുൾകലാം ആസാദ് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി സാമുവൽ കിഴക്കുപുറം, ഡി.സി.സി വൈസ് പ്രസിഡന്റ് എ.സുരേഷ് കുമാർ, റെനീസ് മുഹമ്മദ്, പി.കെ.ഇക്ബാൽ, ജോസ് കൊടുന്തറ, അജിത് മണ്ണിൽ, റജി വാര്യാപുരം, രാജു നെടുവേലി മണ്ണിൽ എന്നിവർ പ്രസംഗിച്ചു.
