തെഹ്റാൻ : ഇറാൻ പ്രസിഡന്റായി തെരഞ്ഞെടുക്കപ്പെട്ട ഇബ്രാഹിം റൈസി സ്ഥാനാരോഹണ ചടങ്ങിലേക്ക് ഇന്ത്യൻ നേതാക്കളെ ക്ഷണിച്ചു. ഓഗസ്റ്റ് അഞ്ചിനാണ് സത്യപ്രതിജ്ഞ ചടങ്ങ്.
കഴിഞ്ഞ ദിവസം വിദേശകാര്യമന്ത്രി എസ് ജയ് ശങ്കർ ഇബ്രാഹിം റൈസിയെ സന്ദർശിച്ചിരുന്നു. റഷ്യ സന്ദർശിച്ചു മടങ്ങും വഴിയാണ് തെഹ്റാനിലെത്തി ജയ്ശങ്കർ റൈസിയുമായി കൂടിക്കാഴ്ച നടത്തിയത്. നിയുക്ത പ്രസിഡന്റിനെ ആദ്യം ഫോണിൽ ബന്ധപ്പെട്ട വിദേശ പ്രതിനിധികളിൽ ഒരാളാണ് എസ് ജയ്ശങ്കർ. പ്രധാനമന്ത്രിയുടെ സന്ദേശവും ജയ്ശങ്കർ നിയുക്ത പ്രസിഡന്റിന് കൈമാറിയിരുന്നു
ക്ഷണം സ്വീകരിക്കുന്നതുമായി ബന്ധപ്പെട്ട തീരുമാനം ഇന്ത്യ ഉടൻ കൈകൊള്ളുമെന്നാണ് റിപ്പോർട്ടുകൾ. സർക്കാർ പ്രതിനിധി തെഹ്റാനിൽ വെച്ചുനടക്കുന്ന സത്യപ്രതിജ്ഞാ ചടങ്ങിൽ പങ്കെടുക്കും. ഇന്ത്യയും ഇറാനും തമ്മിലുള്ള നയതന്ത്ര ബന്ധം ശക്തിപ്പെടുത്തുന്നതിനുള്ള അവസരമായിട്ടാണ് ഇന്ത്യ ഇതിനെ കാണുന്നത്.
