റാന്നി : മന്ദമരുതി – കക്കുടിമൺ റോഡിന്റെ സംരക്ഷണഭിത്തി മഴയിൽ ഇടിഞ്ഞു താണു. ഇതു വഴി പോകുന്ന വാഹനങ്ങൾ അപകടത്തിൽ പെടാൻ സാധ്യത. സ്റ്റോറും പടി കഴിഞ്ഞ് നീരാട്ടു കാവിലേക്ക് പോകുന്ന ഭാഗത്താണ് സംരക്ഷണ ദിത്തി 5 മീറ്ററോളം ദൂരത്തിൽ തകർന്നത്. ഈരൂരിക്കൽ തോമസ് മാത്യുവിന്റെ പുരയിടത്തിലേക്കാണ് മണ്ണ് ഇടിഞ്ഞു കിടക്കുന്നത്. വീതി കുറഞ്ഞ റോഡായതിനാൽ അപകട സാധ്യതയേറെയാണ്.
അത്തിക്കയം – നാറാണംമൂഴി മേഖലയിൽ നിന്നും പെരുനാട്ടിൽ നിന്നും മണിമല, കോട്ടയം ഭാഗങ്ങളിലേകെത്താവുന്നതും പുനലൂർ – മൂവാറ്റുപുഴ റോഡിലേക്കെത്തുന്നതുമായ എളുപ്പ മാർഗ്ഗം കൂടിയാണീ റോഡ്. റോഡു വശം ഇടിഞ്ഞതിനാൽ വാഹനങ്ങൾ ഒതുക്കാൻ കഴിയാത്ത സ്ഥിതിയാണ്. മഴയിൽ ശേഷിക്കുന്ന ഭാഗവും ഇടിഞ്ഞു വീഴാൻ പാകത്തിലാണ് നിൽക്കുന്നത്. പൊതു മരാമത്ത് വകുപ്പിനു കീഴിലുള്ള റോഡ് അടിയന്തിരമായി സംരക്ഷിക്കപ്പെടണമെന്നാണ് നാട്ടുകാരുടെ അവശ്യം.