കണ്ണുര്‍ : കെ.പി.സി.സി ജനറല്‍ സെക്രട്ടറി അഡ്വ.സോണി സെബാസ്റ്റ്യനെ സമുഹമാധ്യമങ്ങളിലൂടെ അപകീര്‍ത്തിപ്പെടുത്തിയ സംഭവത്തില്‍ പ്രതിയായ യു.ഡി.എഫ് ചെയര്‍മാന്‍ പി.ടി മാത്യുവിന്റെ വീട്ടില്‍ നിന്നും പിടിച്ചെടുത്ത ലാപ്പ്‌ടോപ്പും ബി.എസ്.എന്‍.എല്‍ മോഡവും പോലിസ് കോടതിയില്‍ ഹാജരാക്കി. കേസിലെ നിര്‍ണ്ണായക തെളിവുകളായ ലാപ്‌ടോപ്പും അനുബന്ധ സാമഗ്രികളും തിങ്കളാഴ്‌ച്ച രാവിലെയാണ് ആലക്കോട് പോലിസ് തളിപ്പറമ്പ് കോടതിയില്‍ ഹാജരാക്കിയത്.
അന്വേഷണ ഉദ്യോഗസ്ഥനായ ആലക്കോട് സിഐ കെ.വിനോദന്റെ നേതൃത്വത്തില്‍ ശനിയാഴ്‌ച്ച കരുവഞ്ചാല്‍ ടൗണിന് സമീപം വായാട്ടുപറമ്പ് റോഡിലെ പി.ടി മാത്യുവിന്റെ വീട്ടില്‍ നടത്തിയ റെയ്ഡിലാണ് ലാപ്‌ടോപ്പും മറ്റും പിടിച്ചെടുത്തത്.
റെയ്ഡ് നടക്കുന്ന സമയത്ത് പി.ടി.മാത്യുവും ഭാര്യയും അടക്കമുള്ളവര്‍ വീട്ടിലുണ്ടായിരുന്നു. പി.ടി മാത്യുവിന്റെ പേരിലുള്ള ബി.എസ്.എന്‍.എന്‍ ലാന്‍ഡ് ഫോണ്‍ നമ്പര്‍ ബന്ധപ്പെടുത്തിയുള്ള ഇന്റര്‍നെറ്റ് കണക്ഷന്‍ ഉപയോഗിച്ചാണ് സോണി സെബാസ്റ്റ്യനെ അപകീര്‍ത്തിപ്പെടുത്തുന്നതിന് വേണ്ടി ജോണ്‍ ജോസഫ് എന്ന പേരില്‍ വ്യാജ പ്രൊഫൈല്‍ അക്കൗണ്ട് സൃഷ്ടിച്ചതെന്ന് സൈബര്‍ പോലിസ് കണ്ടെത്തിയിരുന്നു. കോടതി അനുമതിയോടെ ലാപ്‌ടോപ്പ് ഇനി സൈബര്‍ പോലിസ് സഹായത്തോടെ പരിശോധിച്ച ശേഷമാകും ഇനി കേസിലെ അനന്തര നടപടികള്‍ സ്വീകരിക്കുകയെന്ന് ആലക്കോട് സിഐ കെ.വിനോദന്‍ അറിയിച്ചു.
