പത്തനംതിട്ട : കൈപ്പട്ടൂര് പാലത്തിന്റെ തകര്ന്ന കൈവരികള് ഫ്ലെക്സ് ബോര്ഡ് കൊണ്ട് മറച്ച് പൊതുമരാമത്ത് വകുപ്പ്. എട്ട് മാസങ്ങള്ക്ക് മുമ്പാണ് പത്തനംതിട്ട – പന്തളം റോഡിലെ കൈപ്പട്ടൂര് പാലത്തിന്റെ കൈവരി വാഹനം ഇടിച്ച് തകര്ന്നത്. എന്നാല് തകര്ന്ന കൈവരി അറ്റകുറ്റപണികള് നടത്താതെ ഫ്ലെക്സ് ബോര്ഡ് കൊണ്ട് കെട്ടി മറച്ച് മാതൃകയായിരിക്കുകയാണ് പൊതുമരാമത്ത് അധികൃതര്. ദേശീയപാത 183 ന്റെ ഭാഗമായ പാലത്തിന്റെ കൈവരി ആര് നന്നാക്കും എന്നതാണ് നിലവിലുള പ്രധാന പ്രശ്നം. ദേശീയപാത അതോറിട്ടിയും പൊതു മരാമത്ത് വകുപ്പും തമ്മില് അങ്ങോട്ടും ഇങ്ങോട്ടും പഴിചാരുന്നതല്ലാതെ പാലത്തിന്റെ കൈവരി അടുത്ത കാലത്തെങ്ങും ശരിയാക്കുന്ന ലക്ഷണവും കാണുന്നില്ല.
ദേശീയപാതയായി റോഡ് ഏറ്റെടുക്കുംമുമ്പേ പണിത പാലമായതിനാല് അറ്റകുറ്റപ്പണികള് നടത്തേണ്ടത് പൊതുമരാമത്ത് വകുപ്പാണെന്ന നിലപാടിലാണ് ദേശീയപാത അധികൃതര്. ദേശീയപാത അധികൃതര് ഏറ്റെടുത്തതിനാല് കൈവരി നിര്മ്മിക്കില്ല എന്ന പിടിവാശിയില് ആണ് പൊതുമരാമത്ത് വകുപ്പ്. പൊതുവേ വീതി കുറവായ പാലത്തില് വളരെ ബുദ്ധിമുട്ടിയാണ് വാഹനങ്ങള് യാത്ര ചെയ്യുന്നത്. പാലത്തിന് ഇരുവശവും പുല്ലുവളര്ന്നതിനാല് കാല്നടയാത്രക്കാരും ബുദ്ധിമുട്ട് നേരിടുന്നു. പാലത്തിലൂടെ നടക്കുമ്പോള് കാലൊന്നുതെന്നിയാല് കാല് നടയാത്രക്കാര് നദിയില് വീഴുന്ന അവസ്ഥയാണ്. ദിശാ സൂചികകളും വളര്ന്നു നില്ക്കുന്ന പുല്ലുകള്ക്ക് ഇടയിലായി. പാലത്തിന്റെ അവസ്ഥ ഈ നിലയില് ആയിരുന്നിട്ട് പോലും ബന്ധപ്പെട്ട ജനപ്രതിനിധികള് ഇടപെടുന്നില്ല. വോട്ട് ചോദിക്കുവാന് ചിരിച്ചമുഖവുമായി എത്തുന്ന ജന പ്രതിനിധികള് കൈപ്പട്ടൂര് പാലത്തിന്റെ വിഷയത്തില് കണ്ണടയ്ക്കുന്ന മനോഭാവമാണ് സ്വീകരിക്കുന്നതെന്നും നാട്ടുകാര് പറയുന്നു.
