തൃശൂര് : കേരളത്തിന്റെ സാംസ്ക്കാരിക നഗരിയില് പുലികള് ഇറങ്ങി. സാംസ്കാരിക നഗരിയിലെ ഓണാഘോഷത്തിന്റെ ഭാഗമായ ഏറ്റവും പ്രധാന ആകര്ഷണമായ പുലികളിയ്ക്കായി വേഷക്കാര് എത്തിത്തുടങ്ങി. അരയില് ചിലങ്ക കെട്ടി പ്രത്യേക നൃത്തച്ചുവടുകളുമായി കണ്ടാല് അമ്പരക്കുന്ന വേഷവിധാനത്തോടെയാണ് ഇരുനൂറ്റിയമ്പതോളം പുലികളി വേഷക്കാര് നഗരത്തിലെ സ്വരാജ് റൗണ്ടിലെത്തിയത്. നഗരം അക്ഷരാര്ത്ഥത്തില് പുലികളിയുടെ ആവേശത്തിലാണ്.
അഞ്ച് സംഘങ്ങളാണ് പുലികളി നടത്തുന്നത്. എലിസബത്ത് രാജ്ഞിയുടെ മരണത്തില് സംസ്ഥാനത്ത് ഔദ്യോഗിക ദു:ഖാചരണമുളളതിനാല് ഇതോടൊപ്പമുളള സര്ക്കാര് പരിപാടികള് ഇന്നുണ്ടാകില്ല. ഓണാവേശത്തില് പുലികളി ആസ്വദിക്കാന് സ്വദേശികളും വിനോദസഞ്ചാരികളുമടക്കം നിരവധി പേരാണ് തൃശൂര് നഗരത്തിലെത്തുന്നത്.
കുതിരപ്പുറത്തേറിയും തെയ്യം വേഷത്തിലുമെല്ലാം പുലിവേഷക്കാര് നഗരത്തിലെത്തി. കാനാട്ടുകര, അയ്യന്തോള്, പൂങ്കുന്നം, വിയ്യൂര്, ശക്തന് എന്നീ അഞ്ച് ദേശത്തിലെ 250ഓളം പേരാണ് പുലികളിയില് പങ്കെടുക്കുന്നത്. കൊവിഡ് വ്യാപനശേഷം നടക്കുന്ന ആദ്യ ആഘോഷമായതിനാല് ഇത്തവണ കനത്ത പോലീസ് വിന്യാസവും തൃശൂര് നഗരത്തിലുണ്ട്.
