മല്ലപ്പള്ളി : പത്തനംതിട്ട – കോട്ടയം ജില്ലാ അതിർത്തിയിൽ കോട്ടാങ്ങൽ – മണിമല പഞ്ചായത്തുകളെ ബന്ധിപ്പിക്കുന്ന ചുങ്കപ്പാറ – പൊന്തൻപുഴ റോഡിലെ പുളിക്കൻപാറ പാലം അപകട ഭീഷണിയിൽ. പാലത്തിന്റെ ഒരു വശത്തെ കൈവരി ഇളകിയ നിലയിലാണ്. ആലപ്ര ഭാഗത്തു നിന്നും ഇറക്കമിറങ്ങി വരുന്ന വാഹനങ്ങൾക്ക് കൈവരിയുടെ തകർച്ചയും പാലത്തിന്റെ വീതിയും അറിയാൻ കഴിയാത്ത നിലയിൽ കൈവരികളിൽ കാട് മൂടികിടക്കുകയാണ്. പാലത്തിന്റെ മധ്യത്തിലുള്ള ഡിവൈഡറിലും കാട് വളർന്നു. ആറര പതിറ്റാണ്ടിലേറെ പഴക്കമുള്ള പാലത്തിന്റെ വീതികുറവ് കാരണം വർഷങ്ങൾക്ക് മുൻപ് പഴയ പാലം നിലനിർത്തി ഒരു വശത്ത് മറ്റൊരു പാലം നിർമ്മിച്ച് വീതി വർധിപ്പിച്ചിരുന്നു. എന്നാൽ ഇപ്പോൾ പഴയ പാലത്തിന്റെ കാലപ്പഴം അപകട സാധ്യത വർധിപ്പിച്ചിരിക്കുകയാണ്.
മുകൾഭാഗത്തു നിന്നുള്ള വെള്ളമിറങ്ങി കമ്പികൾ ദ്രവിച്ച് കോൺക്രീറ്റ് ഇളകി വീഴുകയാണ്. കുത്തനെയുള്ള ഇറക്കവും കൊടും വളവുമായതിനാൽ വാഹനങ്ങൾ പാലത്തിന് അടുത്ത് എത്തിയാൽ മാത്രമാണ് എതിർ ദിശയിൽ നിന്നും വരുന്ന വാഹനങ്ങൾക്ക് കാണാൻ കഴിയുകയുള്ളു. ഇത് പലപ്പോഴും അപകടങ്ങൾക്ക് കാരണമായിട്ടുമുണ്ട്. മൂവാറ്റുപുഴ – പുനലൂർ ഹൈവേയുമായി ബന്ധിപ്പിക്കുന്ന പ്രധാന റോഡായതിനാൽ രാപകൽ വ്യത്യാസമില്ലാതെ വാഹന സഞ്ചാരവുമുണ്ട്. രണ്ട് ജില്ലകളുടെ അതിർത്തി പ്രദേശമായതിനാൽ അധികൃതർ ഈ റോഡിനെ അവഗണിക്കുകയാണെന്നും ആക്ഷേപമുണ്ട്. റോഡിന്റെയും പാലത്തിന്റെയും ശോച്യാവസ്ഥ പരിഹരിക്കാൻ നടപടി ഉണ്ടാകണമെന്ന നാട്ടുകാരുടെ ആവശ്യം ശക്തമായിരിക്കുകയാണ്.
