പുനലൂര്: പുനലൂര് താലൂക്കാശുപത്രിയിലെ ആംബുലന്സ് ഡ്രൈവര്മാര് സ്വകാര്യ ഏജന്സികളെ സഹായിക്കാനായി രോഗികളെ ചൂഷണം ചെയ്യുന്നതായി പരാതി. മണിയാര് സ്വദേശിയും ലോറി ഡ്രൈവറുമായ സന്തോഷിന് ജോലിസ്ഥലമായ കഴുതുരുട്ടിയിലായിരിക്കെ ചൊവ്വാഴ്ച നെഞ്ചുവേദന ഉണ്ടായി. ഒപ്പമുണ്ടായിരുന്നവര് ഉടനെ പുനലൂര് താലൂക്കാശുപത്രിയില് എത്തിച്ചു. ഡ്യൂട്ടി ഡോക്ടര് അടിയന്തര ചികിത്സക്കുശേഷം ഉടന്തന്നെ തിരുവനന്തപുരം മെഡിക്കല് കോളജ് ആശുപത്രിയില് എത്തിക്കാന് ആവശ്യപ്പെട്ടു.
ചില പൊതുപ്രവര്ത്തകര് ഇടപെട്ട് താലൂക്കാശുപത്രിയിലുള്ള ആംബുലന്സ് ഡ്രൈവറെ ഓട്ടത്തിനായി വിളിച്ചു. ഈ ഡ്രൈവര് വിസമ്മതിച്ച് പുറത്തുള്ള സ്വകാര്യ ആംബുലന്സ് ആംബുലന്സ് വിളിക്കാന് നിര്ദേശിച്ചു. ഈ സമയത്ത് താലൂക്കാശുപത്രിയില് രണ്ട് ആംബുലന്സ് ഉണ്ടായിരിക്കെയാണ് സ്വകാര്യ സര്വ്വീസിനെ സഹായിക്കാന് ഇവര് ഓട്ടം പോകാന് തയ്യാറാകാതിരുന്നതെന്നാണ് ആക്ഷേപം.
ഇതിനെതിരെ ആരോഗ്യവകുപ്പ് ഉന്നത അധികൃതര്ക്കും മനുഷ്യാവകാശ കമീഷനും പരാതി നല്കുമെന്ന് ആര്.വൈ.എഫ് പുനലൂര് മണ്ഡലം സെക്രട്ടറി ആര്. വിബ്ജിയോര് അറിയിച്ചു.
