കോന്നി : പുനലൂർ മൂവാറ്റുപുഴ റോഡിന്റെ നിർമ്മാണത്തിലെ അപാകതകൾ പരിഹരിക്കുന്നതിന് അടിയന്തിര നടപടി സ്വീകരിക്കണമെന്ന് സി പി ഐ കോന്നി മണ്ഡലം സെക്രട്ടറി പി ആർ ഗോപിനാഥൻ ആവശ്യപ്പെട്ടു. പുനലൂർ മൂവാറ്റുപുഴ റോഡിന്റെ എലിയറക്കൽ മുതൽ മാമൂട് വരെ കോന്നി ടൗൺ ഉൾപ്പെടെ കെ എസ് റ്റി പി ഏറ്റെടുത്ത ഭൂമി പൂർണ്ണമായി റോഡിനായി ഉപയോഗപ്പെടുത്തണം. കെ എസ് റ്റി പി യും കരാർ കമ്പനിയും സ്വാധീനക്കാരും തമ്മിലുള്ള ഒത്തുകളി അവസാനിപ്പിക്കണം.
സംസ്ഥാന ഗവർമെന്റും ജില്ലാ ഭരണ കൂടവും അടിയന്തിരമായി ഈ വിഷയത്തിൽ ഇടപെടണം. കുമ്പഴ മുതൽ കലഞ്ഞൂർ വരെ റോഡ് നിർമ്മാണത്തിൽ ഗുണനിലവാരം ഇല്ലാത്തതും അന്വേഷിക്കണം. കെ എസ് റ്റി പി ഉന്നത ഉദ്യോഗസ്ഥരുടെ ഗൗരവ തരമായ അനാസ്ഥയും അന്വേഷിക്കണം. ഭൂരിഭാഗത്തെയും റോഡിന്റെ വീതി ഇല്ലായ്മയും നിലവിൽ ഉള്ള വീതിയിൽ തന്നെ റോഡ്ഡ് നിർമ്മാണ പ്രവർത്തനം നടത്തുന്നത് അഴിമതി ഉണ്ടെന്ന് സംശയിക്കേണ്ടിയിരിക്കുന്നു.
റോഡ് നിർമ്മാണത്തിന്റെ മറവിൽ ലക്ഷ കണക്കിന് രൂപയുടെ മണ്ണുകടത്ത് മണ്ണ് മാഫിയയുടെ നേതൃത്വത്തിൽ നടക്കുന്നത് സംബന്ധിച്ച് റവന്യു ജിയോളജി വകുപ്പുകളും അന്വേഷണം നടത്തണം. റോഡ് നിർമ്മാണത്തിന്റെ മറവിൽ നടക്കുന്ന നിലം നികത്തൽ കൂടൽ മുതൽ വകയാർ വരെയുള്ള സ്ഥലങ്ങളിൽ നടക്കുന്നത് സംബന്ധിച്ചും അന്വേഷിക്കണം. അന്വേഷണം നടന്നില്ലായെങ്കിൽ സി പി ഐ യുടെ നേതൃത്വത്തിൽ ശക്തമായ സമര പരിപാടികൾ ആരംഭിക്കുമെന്ന് സി പി ഐ കോന്നി മണ്ഡലം സെക്രട്ടറി പി ആർ ഗോപിനാഥൻ അറിയിച്ചു.
